- Afrikaners must denounce treasonous elements - March 13, 2026
- SDA celebrates recognition for unqualified audit - March 12, 2026
- Plots keeps thickening in insurance murder case - March 12, 2026
Ka letšatši la di 9 Dibokwane 2026, Meyara wa Mmasepala wa Selegae wa Fetakgomo- Tubatse, Khansela Eddie Maila, o ile a tsogela toropong ya Burgersfort le go hlwa gona, a lebeletše moela wa dinamelwa le go netefatša kobamelo ya melao le polokego mebileng bjalo ka karolo ya tlhokomelo ya mmasepala ya go šireletša banamedi le go boloka khutšo ka lefapheng la dinamelwa.
Ketelo ye ya go lebelela e tla morago ga tiragalo ya beke ye e fetilego moo ditsela tša setšhaba di ilego tša thibelwa ka mokgwa woo e sego molaong toropong ya Burgersfort. Nakong ya tiragalo yeo, yo mongwe wa barutwana o ile a gobatšwa ge go be go fošwa sefatanaga sa mohuta wa Avanza yeo e bego e rwela barutwana ka maswika. Tiragalo ye e godišitše matshwenyego mabapi le polokego ya banamedi gomme ya gatelela bohlokwa bja go ba le tlhokomelo ye e tšwelago pele go šireletša barutwana le badiriši ka moka ba tsela.
Meyara o ile a šoma mmogo le bahlankedi ( bahlapetši ) ba tsela le go netefatša kobamelo ya melao ya tsela. Meyara o ile a hlokomela maemo a kobamelo gare ga badiriši ba dinamelwa gomme a lemoga mafelo ao a nyakago tlhokomelo ye e tseneletšego. Nakong ya tshepetšo yeo, go hweditšwe gore dikoloi tše dingwe tšeo di rwalago barutwana di rwala palo ye e fetago yeo e dumeletšwego ke molao. Maemong a mangwe, baotledi ba ile ba fološa barutwana ka thoko ga tsela ka mokgwa wo o sego molaong gomme ba tšhaba ge ba bona bahlankedi ba sephethephethe.
Meyara Eddie Maila o ile a kgalema ka bogale maitshwaro ao, le go hloka maikarabelo, a gatelela gape gore maitshwaro a bjalo a bea maphelo a barutwana kotsing gomme a senya tshepo ya setšhaba mo tshepedišong ya dinamelwa.
“ Rele ba Mmasepala re gatelela le go netefatša gore tshepedišo ya dinamelwa e sepetšwa ka molao le gore badudi ba rena ba dule ba šireletšegile. Ka morago ga ditiragalo tša beke ye e fetilego, go be go le bohlokwa go tiiša tlhokomelo ye le go tiišeletša gore polokego ya banamedi, kudukudu bana ba dikolo, e ka se beelwe ka thoko. Re ipiletša go badiriši ka moka go itshwara gabotse le go obamela molao ka dinako tšohle.” Meyara Eddie Maila a realo.
Meyara o tšwetše pele go leboga dihlopha tša phethagatšo ya molao ka maitapišo a bona a go boloka taolo le go netefatša kobamelo ya melao ya tsela a gatelela gore tšhomišano ye e tšwelago pele magareng ga Mmasepala, bahlankedi ba molao le ba ba amegago ka dinamelwa e bohlokwa go šireletša banamedi.
“Retla o dula o ikgafile go šireletša polokego ya setšhaba, le go netefatša gore badiriši ka moka ba dinamelwa ba phetha ditirelo tša bona ka tsela ya molao, polokego le maikarabelo”. Meyara Eddie Maila a ruma kago realo.
