- PHINNET CITY CRUISE TO 3-0VICTORY OVER GOSEBO UNITED - October 1, 2026
- Mayoral candidatesnonsense distracts realvalue of local elections - October 1, 2026
- COMMUTERS WELCOME NEW BUSES - October 1, 2026
Ka Karabo Makao
Meyara wa masepala wa selegae wa Fetakgomo Tubatse, khansela Dorah Mphethi, o eteletše pele kemedi ya masepala maetong a go lekola tšwelopele ya diprojeke tše bohlokwa, go akaretša lefelo la selete la go lahlela ditšhila la Burgersfort (Burgersfort Land Refill), tsela ya Dresden le protšeke ya tlhabollo ya Mashifane Park ya tirišommogo ya dikgwebo le bodulo kadi 22 Lewedi 2026.
Maeto a a file baetapele ba masepala sebaka sa go bona ka mahlo mošomo wo o tšwelago pele, go amogela dipego tša tšwelopele go tšwa go dihlopha tšeo di hlokometšego diprojeke le go šupa ditlhohlo tšeo di ka diegišago go phethwa ga tšona ka nako.
Lefelong la selete la go lahlela ditšhila la Burgersfort, go begilwe gore mošomo o šetše o fihlile go diperesente tše 65, gomme protšeke e letetšwe go phethwa ka la 30 Phupu 2027. Ge lefelo le le thomile go šoma, le tla thuša tikologo ya Burgersfort ka bophara, gomme la kaonafatša bokgoni bja masepala bja go laola le go hlokomela ditšhila.
Kemedi ye gape e etetše tsela ya Dresden yeo e lego botelele bja dikhilomithara tše 2,7. Mošomo wa tsela ye o šetše o fihlile go diperesente tše 70. Ga bjale go tšwela pele ka go ala dikarolo tša motheo wa tsela, gomme protšeke e letetšwe go phethwa mafelelong a Diphalane 2026.
Go Mashifane Park Mixed-Use Development, tšwelopele ya protšeke ka kakaretšo e begilwe e le diperesente tše 49.
Mošomo wa go tsenya diphaepe tša kelelatšhila (sewer pipes) o fihlile go diperesente tše 89 gomme o letetšwe go phethwa mafelelong a Diphalane 2026. Mošomo wa go tsenya diphaepe tša meetse wona o šetše o phethilwe.
Masepala ga bjale o letetše go kgethwa ga moabi wa ditirelo yo a tlago go tsenya legora la ClearVu go dikologa lefelo leo. Mafelo a naga ka gare ga tlhabollo ye a šetše a le gona gore a rekišwe.
Maeto a a dirilwe ka maikemišetšo a go netefatša gore diprojeke di tšwela pele go ya ka dinako tšeo di beilwego le gore ditlhohlo tšeo di tšwelelago di šogwe ka pela. Baetapele ba masepala ba gateletše bohlokwa bja tšhomišano magareng ga masepala, borakonteraka le dihlopha tše dingwe tšeo di amegago, gore diprojeke di phethwe ka nako gomme di tle di thuše badudi ba tikologo.
Meyara Mphethi o boletše gore maeto a ka mehla a mafelong a diprojeke a bohlokwa ka gobane a thuša masepala go hlokomela tšwelopele ya mošomo ka go lebanya le go rarolla ditlhohlo pele di baka tiego.
“Setšhaba sa rena se nyaka go bona diprojeke di phethwa le ditirelo di fihlelela batho. Re tlile mo go bona tšwelopele ka mahlo a rena, go kwešiša ditlhohlo tšeo di lego mo lefelong le, le go netefatša gore mošomo o tšhaba diatla. Re tla tšwela pele go hlokomela diprojeke tše go fihlela di phethilwe gomme di thoma go hlankela batho ba rena,” go boletše Meyara Mphethi.
Meyara o be a sepedišana le seboleledi sa khansele (Council Speaker), Makhanselara Makgalema Shoba, sefepi segolo sa khansele (Council Chief Whip), Makhanselara Jeffrey Mashoeu, maloko a komiti ya phethagatšo (Excutive Committee), go akaretša mokhanselara Halinda Mojalefa le Elsie Mokome, le bahlankedi ba bangwe ba mmasepala.
