- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka: Karabo Makao
Ka letšatši la šupa kgwedi ya Lewedi ngwaga wa 2025
Sekolo sa digotlane sa Maladuma se be se thabile ge se be se tšea karolo mosepelong wa boikhutšo wa 5km go tloga sekolong sa bona go fihla tseleng ya R81 kua Ga-Sekgopo.
Mosepelo wo o be o hlophilwe ke sekolo ka taolo ya hlogo ya sona, Mohlomphegi Segwapa, ka maikemišetšo a go thekga bana ba ba phelago ka bogolofadi sekolong seo, le go godiša tlhokomelo le phahlošo ya setšhaba.
Mosepelo wo o be o šetšwe morago e bile o farafarilwe ke bahlankedi ba molao go akaretšwa Modjadjiskloof SAPS, moo Acting Station Commander Captain Raholane a bilego gona, gammogo le kgoro ya maphelo go tšwa kliniking ya ga Sekgopo.
Mohlomphegi Segwapa o boletše a thabile ka tshepetšo ya mosepelo wo le tlhompho yeo sekolo se e hweditšego go tšwa go setšhaba. “Re leboga ka pelo ka moka bao ba thušitšego ka leeto le, kudu batšeakarolo bao ba sepedisitšego bana ba rena ba ba phelago ka bogolofadi. Go bontšha gore setšhaba sa rena se na le pelo ya botho le seriti.” Gwa realo hlogo ya sekolo.
Bana ba sekolo ba ile ba thaba ge ba dumedišwa ke batšofe le bafsa, bao ba ilego ba ema tseleng go ba šetša le go bafa tlhompho.
Mosepelo wa Maladuma Fun Walk wo o lebelelwa bjalo ka mathomo a lenaneo le go lebeletšwego gore le tšwele pele ngwaga le ngwaga go hlohleletša bana ba bogolofadi le go oketša tirišano setšhabeng.
