Email lerato@thereporternews.co.za | 0820747215
- Limpopo regional leaders legit Mbalula - October 8, 2025
- Lapa la ga-Nkuna la go atelwa ke thari le hloka thušo ka potlako - October 3, 2025
- CGCSA Hosts Inaugural Food Safety and Sustainability Seminar - October 2, 2025
Kua motseng wa Bothashok ward 20 Dithabaneng, lapa la ga Nkuna la batho ba 11 le lebane le bothata bjo bogolo bja go dula ka gare ga ntlo e tee ya RDP. Le ge le hweditše thušo ya go hlatlegelwa ka tša maseleng ke baithaopi le tše dingwe go akaretšwa le tšeo ba felwego ke Melvin Seroka, ditlhohlo tša bona e sa le tše ntši kudu gomme maphelo a bona a tšwela pele le go ba boima. Melvin Seroka o neetše ka dieta le diaparo tše mpsha go lapa le la ga-Nkuna. Modimo a mo godiše, a okeleletšwe Moroka yo wa babinatlou.
Ka wa gagwe wa go ngonela bogobe Morena Seroka o ntšhitse a, a bile a sekaseka le go nyaganyaga megokgo, ya lenyamo : ” Ke thabetše go thuša ba lapa la ga-Nkuna. Ke duma nke batho ka moka bao ba kgonago go hlatlegela ba ka ikamoga le go tsenya seatla gomme ra kgontšhwa go fokotša le go fediša mathata a ka moka. Re leboga go menagane bao ba kgonnego go thuša gape le bao ba re kgwathilego le go re loma tsebe ka bothata bjo.” A kgeba ka ao, Tlou a’ Magokolo a bile a teile fase ka tolwane.
Lapa la ga-Nkuna le phela ka mphiwafela wa batho ba babedi ka monwana, ka fao ga o enele le go kgotsofatsa maloko a 11 ka lapeng. Dilo di pakeno di nameletše, di a bitša. Bana ba bangwe ga ba na le dipukwana tša boitsebišo. Se se ba palediša go hwetša thušo le ditirelo tša ka mmušong. Ba lapa ba ka thabela thušo ye nngwe le ye nngwe mabapi le go kaonafatša seemo sa bona.
Ntlo ya RDP yeo e swanetšego go ba seširelo sa bona ga e seemong se sekaone, ga ya bolokega, ke sefu. E senyegile, e bontšha ka gare le ka ntle gomme phefo le dipula di tsena moroba. Ka nako ya dipula ba lebagana le bothata bjo bogolo moo ba swanelwago ke go ema ka maoto ka gare ga ntlwanalefahla yeo, maonyane. Go begwa gore go tloga ka ngwaga wa 2018 ga se nke ba eba le ntlwana ya botshwelamare. Yeo ba bego ba e diriša e ile ya wela. Le tšhwene ya tšhwenetšhwene ga a gona yo a kilego a e bona e ithuša, le fao e ithušetšago gona goba e širelago ke thopeng. Ba ka se phalwe le ke bathabeng, bomagobjane.
Lapa la ga- Nkuna le kgopela thušo go setšhaba, mekgatlo ya selegae le mmušo. Motho ke motho ka batho, MaAfrika. Ba kgopela thušo ya dijo, diaparo, dikobo tša go robala le go lokišetšwa ntlo ya bona goba e agwe ka boswa. Ba kgopela gape gore ba masepala ba tle ba bone seemo sa bona ka kholofelo ya go holwa le go kwelwa bohloko. Diatla di a hlatswana, mabesong. Go fa ke go fega. Go tla fegollwa ka mohla wo boima boka mo. Bao ba ka go tšwela lapa le molemo, go le agela le go le agelela ba ka ikgokaganya le Melvin Seroka nomorong ye: 076-0218-707.
