- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Badudi ba motse wa Leeuwfontein RDP kantlenyana ga toropo ya Marble Hall ba ipopile ngatana e tee go hloma lesolo la #JusticeForBotshelo morago ga go itemogela dipolao tša bong tša go garola matswalo kgweding ya Ngwatobošego. Ditiragalo tše di bilego gona tikologong yeo go akaretša mosadi yoo go kwagalago a bolaile molekani wa gagwe ka mphaka, gomme dibeke morago ga fao gwa kwagala gape gore lesogana la mengwaga ye masometharotee le ile la hlasela le go bolaya ga bohloko lekgarebe leo go tsebjago le be le segišana naye e bile le le mmeleng. John Leshilo yo e lego moetapele wa badudi ba Leeuwfontein RDP o hlalositše gore moreromogolo wa lesolo la bona le gore ba duma go bona dipolao tše bjalo ka tše di fela lefelong la bo bona.
“Gabotse lesolo le ga se feela go lwela toka ya Botshelo, ke la batho ka moka bao ba ilego ba itemogela ditlaišo goba dipolao tša bong. Re lemogile gore bao ba re etilego pele kua mmušong ba palewa ke go lwantšhana le dilo tša mohuta wo. Sa go kweša bohloko ke gore go na le masolo a mehutahuta go tšwa go mmušo ao re botšwago gore a lwantšhana le tlhobaboroko ye e bile go beilwe kgwedi yeo go thwego ke ya basadi, efela re sa itemogela ditlaišo le dipolao tša bong. Ga go nko yeo e tšwago lemina. Dipolao tše di diragetše ka kgwedi yeo ya basadi le ge e le gore gona le monna yo a bolailwego. ”
Kwešišo ya ka ke gore mmušo wa rena o alafa bolwetši bjo e sego bjona.” A realo Leshilo.
Badudi ba ile ba kgobokana ka Labobedi la letšatši la senyane Setemere mesong gomme morago ga moo ba gwantela le go gwatakela Marble Hall ka maoto fao ba bego ba lebeletše gore mogononelwa Thabo Aphane yoo a golegilwego mabapi le polao ya lekgarebe la gagwe Botshelo Moimana o tla tšwelela kgorong ya tsheko. Efela Leshilo o re go fihleng ga bona fao ba boditšwe gore molato o šuthišeditšwe go la lesomeseswai (18) September fao go bilego molaleng gore molato o išwa kgorongtsheko ya Groblersdal ka lebaka la go fapana ga melato.
Kholofelo ya rena ke gore molato wo o tla išwa kgorong tsheko ya bosetšhaba.” Leshilo a hlalosa ka go realo.
O feleleditse ka go re badudi ka bophara ba duma go ka bona ba na le lefelwana la kopanelo le boitshebo la setšhaba fao go ka go bolelwa ka ditlhohlo tša mehutahuta le go thuša goba go fana ka tshedimošo moo baswa ba motse ba ka go holega ka tša thuto, go šeditšwe kudu mathata a mantši pele a ka ba tšwa ka diatleng. Ga bo patege boroko le ga tee.
