Email lerato@thereporternews.co.za | 0820747215
- We can’t continue flirting with criminality and expect to be safe - October 15, 2025
- Limpopo regional leaders legit Mbalula - October 8, 2025
- Lapa la ga-Nkuna la go atelwa ke thari le hloka thušo ka potlako - October 3, 2025
Ka: Ntobeng Ramotjatji Klaas
Ka letšatši la masomepedi seswai kgwedi ya Moranang 2025, seriri se be se e ja seraara, seraaraa se e ja seriri, moropa o tlapela seata sentsokela. Mamphekgo ” Pedigadi” Mahlako wa mengwaga ye masomepedi šupa gotšwa motseng wa Phaahla Manoge gape e le mohlami goba modulasetulo wa Pedigadi Foundation o ile a dira moletlo wa go phatlalatša pukutheto ya gagwe semmušo yeo e bitšwago ” Tša Segagešo”. Go be go tlile Photo le Masemola go tlo keteka mmogo phihlelelo ya gagwe ya go ngwala pukutheto ya ya mathomo ya Sepedi.
Moletlwaneng wo, go be go nale direti le dibini tša baswa. Batho ba ile ba fepšwa ka mmino wa kiba gotšwa go sehlopha sa Bapedi ke rena, dikgarebjana tša Dinkwe Masesane, tša matswele a mootlwanoko, bao ba thabišitšego baeng ka direto le mmino wa setšo ba tšhankgetše ka maetse,ditlhokwa, dintepa le mabole. Basadi ba Maragathetho le bona ba re re ka se phalwe ke bana re ba belege.
Malome wa gagwe e lego Mamphekgo K.K o boletše le mare a sa metše ge a be a bolela ka mokgwa o Mahlako a go gola e le ngwana o a bego a rata go theeletša ka šedi ge a rutwa ditaba tša segagabo, ga golo direto, e bile go itšhupile gabotse gore ke ngwana wa pelotheri ka ge a sa lebale ka pele tšeo a di rutilwego. Taba ye le barutišigadi ba gagwe le bona ba ile ba e lemoga bonnyaneng bja gagwe dithutong.” Malomeagwe o tšwetše pele ka go bontšha gore, ga le dume feela, le duma le etšwa marung, ka ge rakgolo wa gagwe e be e le seretosegolo sa motse wa Phaahla-Manoge le ge a be a sa tsebe go ngwala.
Mahlako o re o hlohleletša baswa gore ba rate leleme la letsweleo e bile ba ikgantšhe ka lona. O tšwetše pele ka go leboga barutiši ba gagwe ba maloba e le Morena Mailula le Morena Makgwale, ka motheotia wa polelo ya maleme dithutong tša gagwe.
