- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka: Karabo Makao
Moetapele wa mokgatlo wa SANCO, Morena David Mokoena, o ile a dira letšatši la moswananoši ka go ema le barutwana le barutiši ba sekolo sa St Thomas moo ba abetšego malapa a go lekana a lesomehlano (15) diphuthelwana tša dijo motseng wa Praktiseer.
Diphuthelwana tše di be di akaretša bupi bja 12,5kg, swikiri ya 10kg, dinawa, dihlapi tše di bolokilwego ka gare ga dihlapibolekana gammogo le tše dingwe tše di ka go thuša malapa ao go phela matšatši a mmalwa ntle le tlalelo. Badudi ba be ba tlile ka makatanamane go tla go ikhweletša dijo, gomme seo se bontšhitše gore go na le tlhaelelo ye kgolo mo setšhabeng.
Hlogo ya sekolo sa St Thomas, Morena Matthew, o boletše ka boikgantšho gore sekolo sa gagwe se tla tšwelapele ka go bontšha lerato le boikgafo bja go thuša bao ba hlokago. “Maikemišetšo a rena ke go thuša batho bao ba hlokago ka ge malapa a sa lekane. Re thomile lesolo le mengwaga ye mene ye e fetilego gomme re tla tšwelapele, ka gobane re na le toro ya go fihlelela badudi ba metsemabapi. Go fa dijo ga se fela ga bjale, eupša ke sešupo sa gore setšhaba se swanetše go ema mmogo.”
Mokgatlo wa SANCO o itswalantše le sekolo se ka go ikgafa le go bontšha gore mmogo re ka fenya tlala.” David Mokoena o lebogile ka gore :“Re leboga kudu boetapele bja St Thomas ka ge ba bontšhitše lerato la makgonthe la go thuša setšhaba. Se se re bontšha gore rena batho re swanetše go ema mmogo ka mehla, gomme re se lebale bao ba sa kgonego go ikhola. Go ema gotee ke sona se se tlago aga bokamoso bjo bobotse sa go lwantšha le go fetša tlala.”
Badudi ba bangwe ba ile ba bolela ba thabile gore dijo tše di tla thuša kudu malapeng le magaeng a bona. Ba bangwe ba boletše gore ditiragalo tše bjalo di fa setšhaba tshepo ya gore go sa na le batho ba ba nago le pelo ya go thuša.
Tiragalo ye e bontšhitše setšhaba sa Praktiseer gore ditiro tša go fa dijo ga se fela ka lebaka la go nyaka seriti, eupša ke karolo ya go aga setšhaba se se nago le tekatekano, khutšo le lerato. Segagabomotho se re :” Go fa ke go fega.” Seatla go segofatšwa seo se fago.
