- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka Cynthia Nkgudi
Ka morago ga go tlaišwa ke bohodu bja go utswiwa ga dithapo tša mohlagase nako e telele badudi ba Dihlabaneng B ka tlase ga Mmasepala wa Makhudumathaga ward 16 ba ile ba ipopa ngatana e tee go lwantšhana le tlhobaboroko yeo ba ikhwetšago ka gare ga yona. Badudi ba ile ba kopana ka labobedi la Lesometshela kgwedi ya Septemere le maphodisa a Sekhukhune fao ba ilego ba tsweletša dillo tša bona. Mmogo setshaba le maphodisa ba ile ba hloma Community Policing Forum (CPF) gomme badudi ba e ka bago ba seswai ba kgethilwe go ithaopa go eta pele lesolo leo.
Modulasetulo wa CPF Morena Sam Mashanya o re ba holofela gore badudi ba tla somišana le bona go leka go fediša bothatata bjo. “ Bjale ka moleloko wa boetapele, re kgopetše setšhaba go swaragana gomme re boele mola go leanophethagatšo la rena la maloba mola re be re se na le mohlagase. Re kwane go re lapa le lengwe le le lengwe le be le nakana gore ge ba itemogela go hulwa goba go na le ka mokgwa wo ba gakanegago ka gona, ba e letše gomme re lebe fao nakana e llago gona.
Leano le le ile la re šomela kua morago ra ba ra hwetša mohlagase. Re ile ra iketla ra ipotša gore bohodu bo tla fokotšega bjale re itemogela go hulwa ga dithapo tša mohlagase.” A realo Mashaya a bontšha gape ka fao ba kwanego gore maleloko a maswa a tle a hwetše tshedimošo goba yona thuto mabapi le maikarabelo ao ba a rwelego. Mongwaledi wa CPF e lego Emma Tau yena o hlalositše ka fao taba ye e sa ba jesego di wela e bile ba duma go bona go le diphetogo tikologong ya bona. “ Ga se ra swarega gabotse re le badudi ba Dihlabaneng ka go hulwa ga dithapo tša mohlagase ka ge re ikhwetša nako ye ntši re e ba swiswing. Re ipotšiša gore ge ba fetša go hula dithapo go tla latela eng. Re dirile boipiletšo go setšhaba gore lapa ka lapa ba tšhume mabone kudu a ka ntle gore ge mahodu ao a leka mediro ya bona go bonagale ka bjako, ba paogele kua. Baswa ka ge e le batho ba go lala ba sasanka mašego, ba ka re tšwela mohola go hlwaya tsebe le bo bea leihlo. Re hlomile gape le lesolo la street committee fao baagišani ba swanetšego go swarišana ka go diriša mokgwa wa ‘please call me’ ge go na le se se ka bago se belaetša ka malapeng. Re kwane gape le gore re sware kopano kgwedi ka kgwedi fao re tla go fa kgatelopele goba taba efe le efe yeo e amago motse wa bo rena”. Mashanya a ruma ka go realo.
