- Illegal gambling crackdown gains momentum - April 20, 2026
- Former municipal legal manager in court over tender - April 20, 2026
- Four nabbed in Molemole crackdown - April 16, 2026
Go tsogile kgaruru motseng wa Mošira kgauswi le Moroke moo badudi ba emišitšego projeke yeo e filwego rakonteraka ya go thuthupiša . Se se latela ka morago ga go se kwane ka wa lehlabula magareng ga setšhaba le rakonteraka mabapi le go hlongwa ga dithuthupiši pele go ka fihlelela kwano.
Rakonteraka wa Taolo Construction, ka tšhomišano le ba moepo wa Veltarra Platinum Mine yeo e tsebegago bjalo ka Twickenham Mine, o be a thomile go hloma dithuthupiši lefelong leo. Le ge go le bjalo, badudi ba re seo se dirilwe ntle le tsebišo ye e lekanego gape ntle le go boledišana le bona bjalo ka ge go be go dumetšwe kopanong ya setšhaba yeo e ilego ya swarwa ka letšatši la 08 Dibokwane( February) 2026.
Moemedi wa setšhaba Lacy Maboko o boletše gore ba ile ba makatšwa ke ge ba hwetša dithuthupiši di šetše di hlomilwe. “ Ka la 08 Dibokwane re be re kwane gore rakonteraka o tla boela go rena ka dikarabo le diphetholo pele ga ge a ka tšwela pele. Go re tsošetša dithuthupiši re sa tsebišwa ke go re nyatša le go se hlomphe setšhaba.” A realo.
Badudi ba ipelaeditše ka taba ya polokego, ba re ba tshwenyegile ka gore ge go ka dirwa dithuthupišo, mengwako ya bona e ka senyega. “ Re botšišitše gore ge mengwako ya rena e ka phatloga goba ya thuthupišwa, re tla llišwa bjang? Ga re a hwetša karabo ye e kwagalago.” Go boletše yo mongwe wa badudi yoo a bego a le gona nakong ya boipelaetšo.
Ka Labobedi la 09 Dibokwane 2026, setšhaba se ile sa ya lefelong la mošomo gomme sa emiša go tšwela pele ga mešomo . Go ile gwa bitšwa maphodisa mmogo le ba DMR Explosives go tla go laola seemo le go netefatša gore go ba le polokego. Go tšere nako gore setšhaba se iše matswalo fase morago ga poledišano tše di sepetšego nako ye telele.
Ba Taolo Construction ba boletše gore khamphani e na le ditumelelo ka moka tše di nyakegago go tšwa go balaodi ba maleba. “ Re šoma ka molao gomme re na le ditumelelano. Re kwešiša dipelaelo tša setšhaba, gomme re ikemišeditše go rwala maikarabelo ge go ka ba le tshenyo goba gwa direga phoso. Re nyaka go šoma ka kgotso le badudi,” ba realo.
Le ge go le bjalo, setšhaba se gateletše gore taba ya menyetla ya mešomo le yona e swanetše go elwa hloko. Ba re projeke ye e swanetše go hola badudi ba Mošira pele.
Rakonteraka o tshepišitše go tsitsinkela taba ya go thwala badudi le go tšwela pele ka dipoledišano le baetapele ba motse gore go hwetšwe tharollo ya go kgotsofatša mahlakori ka bobedi. Mo nakong ye, mošomo o eme go fihlela go fihlelelwa kwano ya go felela, mola setšhaba se letetše karabo ye e kwagalago mabapi le polokego le menyetla ya mešomo. Lehutšo le kaka legonono. Di tla bonwa ke masa ka go hloka swele. Kholofelo ke gore go tla sagalala, melato gwa rerišana.
