- Afrikaners must denounce treasonous elements - March 13, 2026
- SDA celebrates recognition for unqualified audit - March 12, 2026
- Plots keeps thickening in insurance murder case - March 12, 2026
By Cynthia Nkgudi
Moetapele wa maloba wa sedikothuto sa Lobethal Dr Segwadi Joseph Kokela o hlatlošeditšwe maemong a maswa a go ba molaodimogolo wa selete sa thuto wa motšwa o swere (Acting District Director) sa borwa bja Sekhukhune, go tloga ka la Pele Dibokwane ngwageng wona wo wa 2026.
Dr Kokela o bile molaodi wa sedikothuto go tloga ngwageng wa 2017 fao a bapetšego karolo ya gagwe ka bokgwari le botswerere “Ke ikwa ke hlomphegile ebile ke phophoma ka maikutlo a fapanego ka go hlatlošetšwa maemo a a maswa, ke dumela gore tše ka moka ke ka thato le tlhahlo ya Modimo. Ke ikwa ke le motlotlo go ka kgethwa ka gare ga balaodi ba lesome-tshela” gwa realo molaodi wa selete.
Dr Kokela o thomile leeto la gagwe la borutiši ngwageng wa 1992 morago ga gore a dire dithuto tša gagwe kholetšeng ya thuto ya Sekhukhune, gomme a hwetša lengwalo la gagwe la Diploma la thuto ya dikolo tše phagamilego dithutwaneng tša English le Geography ngwageng wa 1991.
O ile a thwalwa bjalo ka hlogo ya lefapha la sekolo thutong ya Social Science ngwageng wa 1996. Ka ngwaga wa 2006 o ile a ba hlogo ya sekolo gomme ka 2007 o bile maemong a Senior Education Specialist for Business Studies and Economics seleteng sa borwa bja Sekhukhune. Go tloga ngwageng wa 2009 o ile a šoma bjalo ka Senior Education Specialist for Intergrated Quality Management Systems (IQMS) mo profenseng ya Limpopo lefapheng la thuto gomme ka 2010 o ile a ba Deputy Chief Education Specialist lefapeng la Monitoring School Standards.
Le ge ele gore Dr Kokela o tletše ka maikutlo a fapanego go akaretša a letšhogo ka ge a maemong a go nyakega maikarabelo a magolo kudu ore o ikemišeditše go šoma ka boikgafo ntle le go nyamiša setšhaba “Maikemišetšo magolo a ka ke go phethagatša mošomo wo ntle le go dika dika. Go eta pele kgoro ye e phatlaletšego ka mešomo ga go bonolo ka fao ketla phela ka mmolelo wa Japanese Kaisen woo o re go; Go kaonafatša go ya pele, go agella godimo ga seo se thomilego ke Morena Nkadimeng TG yoo a rotšego marapo” A realo Kokela. Yena o na le lengwalo a PhD( Doctor of Philosophy) go tšwa unibesithing ya Tshwane e le go TUT, leo a le feditšego ka ngwaga wa 2021. O feditše dithuto tša gagwe tša Masters degree thutong ya; Masters in Education planning, Economics le ya International Development Unibesithing ya London ka ngwaga wa 2009. O feditše gape dithuto tša gagwe tša Bachelor of Arts (BA) in Education le Unibesithi ya Afrika Borwa (UNISA) ka ngwaga wa 2003. Dr Kokela o na le letlakala la thuto la Labour Relations and School Management yeo a e dirilego le Unibesithi ya Afrika Borwa (UNISA) ka ngwaga wa 2005.
