- Batho ga re meno ga re lekane. - April 29, 2026
- SELEPE ALL STARS SUFFERS DEFEAT TO ALL FOR ONE - April 29, 2026
- Justice, policing mustnever be about clout - April 29, 2026
O wa re tlaiša, o nale go kganya le boikgantšo,
O wa re tlopatlopiša, o nale makoko le boikgogomošo,
O wa re tshetshethiša boka kgaka re phedišwa senonyana,
O wa re nyefola, o wa re tlontlolla, o ŝišitše ka lenyatšo.
Dipuku mekgobokgobo o phutholotše di go phuthile,
Bohlale o kgobokeditše wa ikgobokeletša kgopolong,
Ya gago kgopolo e gana go swara e a go hlahlathiša,
Le ge phapušing ya boithutelo o apeilwe ka thuto dithutong.
O nale letomatomo setomatomane o a re tomela,
O akalala o se nong seakalala o tlo buragana,
O fepetšwe diatleng, o fefilwe lenaka le sa tlo go hlaba,
O tlapetše dithaka le bagolo wa dikgobe tša nnyola.
E tlo fihla nako tša lefase tša go fihlela tša go tatetša,
O itira o ka re matlakala dipuku o phuthulotše o nnoši,
Dithaka di go fetago ka dithuto le dithoto meno o melela a lešeka,
Pitša mpherefere o fehla o phuthumetša mollo pherefere.
O re kgantšhetša maatla, a gago e le megokgo ya batho,
Maatla o khuparolotšego diatla tša bahumanegi go ikhupariša,
Ya bona megokgo e tsorotla e sa fele ka ge o hloka botho,
Megokgo ya tšhuana ke a gana e ka se wele fase o e tlaiša.
Dithaka o nyatša le go nyaletša dikgopolo le dipereko,
O bona nke di a go tsogela o itsoša ka ditseka tša bangwe,
Dithaka tša gatela pele o swiswala pelo wa swawalatša,
O rata go phala, o gana go phalwa, dithaka di sa tlo go phala.
Bagolo ba go godišitšego o tšola ditšwaro wa fošetša kgole,
O tlapetše bohle gohle moilakhutšo nkekema o kekemile,
Phenkgišano o e kgorametšego e gapiwa ke mona pelong,
O hloka ba maele senganga ba go eletše o hwetše khutšo.
E tlo fihla nako sefumaribugetša sa ribugetša,
E tlo fihla nako diphofa wa hlobiwa makoko a kokobana,
E tlo fihla nako ra ikhutša bophokgo bja phokgo e re phekgolago,
A tlala a ipša madiba, a šuthelela madibana.
Modimo o re bopile go fapana wa meno ganong,
Dimpho re filwe tša go se swane go tšwa pelegong,
E ba mojasagagwe o iphihle, ke je waka molatšana morathana,
O nale boikgantšho, batho ga re meno ga re lekane.
