- SBV Beat Maubeng FC 2-0 in Hollywoodbets Regional League Match - May 18, 2026
- Ramaphosa could face impeachment 2 years on - May 18, 2026
- Badudi ba abetšwe monyetla wa go šoma Mamphokgo Sports Complex - May 18, 2026
Ka Cynthia Nkgudi
Badudi ba tikologo ya Mamphokgo ka tlase ga mmasepala wa selegae wa Ephraim Mogale bao ba ilego ba ntšha dingongorego mabapi le go se thwalwe go agweng ga lepatlelo la Mamphokgo Sports Complex, leo projeke ya lona e sa lego e thoma go tloga ngwageng wa 2017, ba filwe monyetla wa go ka šoma projekeng yeo.
Badudi ba ile ba emiša projeke yeo e le ge ba leka go ka goga šedi ya mokhanselara wa bona wa ward 10, go fihlela ge a bitša kopano ya tšhoganetšo ya setšhaba go tla go kwa ka tsebe dillo tša badudi.
Kopanong ya bona yeo e bego e swarwetšwe sekolong sa tlase sa Mamphokgo Primary ka la 04 Hlakola 2026, badudi ba ile ba gatelela gore go thwalwa ga bafaladi ka bontšhi ga go ba sware gabotse, gape le go kgopela gore ba fiwe le ge e ka ba diperesente tše Masometharo (30%) tša sekgoba sa mošomo bjale ka ge e le “bana ba mobu”.
Michael Mampana yeo e lego mongwaledi wa Mamphokgo Development Forum e bile e le yo mongwe wa bao ba thwetšwego go šoma fao lepatlelong, o tšweleditše sello sa gore le ka morago ga kopano ya bona le mokhanselara bafaladi ba ile ba tšwela pele ba šoma ebile badudi ba abetšwe mošomo wa lebakanyana feela woo o ka felago go se go ye kae.
“Re le setšhaba re ile ra gatelela tlhobaboroko ya go thwalwa ga bafaladi bao e bilego ba se nago le mangwalo a maleba go etša dipukwana tša boitsebišo le go se lekolwe ga lefelo pele ga ge projeke e thoma (site inspection) le ge go be go ntšhitšwe mašeleng a go lekana R1,8 million ao a bego a beetšwe tekolo ya lefelo leo pele mošomo o ka thongwa. Go tšweleditšwe gape le ntlha ya gore badudi, kudu borakgwebopotlana, ga se ba fiwa monyetla wa go ka dira dikgopelo tša moshomo. Le ge e le gore re ile ra ba le dikgakgano kopanong ya rena, mafelelong re ile ra tshepišwa gore re tla hwetša monyetla wa go šoma,” Gwa realo Mampana a bontšha gape gore ba ile ba ba le kwano le mokhanselara gore ba nyake kgwebo yeo e emego gabotse tikologong ya gabo bona gore ba kgone go efa monyetla wa go šoma projekeng gomme ba thwalwe ka tlase ga yona.
Maphake Morwaswi le yena o gateletše gore mašeleng a be a beilwe go lekola le go kgola lefelo leo pele ga ge projeke e ka thoma, bjale badudi ga se ba hwetša dikarabo gore e ka ba a šomišitšwe go dira eng.
“Bašomi bao ba thomile go šoma mola e le gore go be go swanetše go lekolwa lefelo le go kgola pele, efeela ga se ke ba dira bjalo ka ge ba hweditše moago o šetše o le gona o agilwe. Re gakantšhwa ke gore mašeleng ao a ile kae ka ye nako ka ge mošomo wa tekolo ya lefelo ona o se wa dirwa. Yengwe gape ke gore go tloga ka la 03 Hlakola (March) 2025 go fihlela 31 Phupu (August) 2025 ge rakontraka a thoma mošomo ka lepatlelong, ga se a tla le baleti ba gagwe. Seo se re tlabile ka ge mmasepala wa rena wa Ephraim Mogale o tlišitše baleti bao e bilego ba lefelwa ke bona mola re tseba ge rakontraka a thoma mošomo, a swanetše go inyakela baleti. Se re nyakang go se tseba ke gore mmasepala o šomišitše bokae go lefela khamphani yeo ya baleti gape le gore go kgonega bjang gore baleti ba tlišwe ke mmasepala go lota thooto ya rakontraka?” A rialo modulasetulo wa Mamphokgo Development forum.
A tšwela pele go hlalosa gore rankontraka o thomile go nyaka khamphani ya bona ya baleti ka di 1 August 2025 morago ga gore setšhaba se ngongorege.
“Re hloka dikarabo gore lebaka e bile lefe gore rakontraka a nyakelwe khamphani ya baleti ebile ge eba go bile le kwano, re hloka go e tseba bjalo ka setšhaba. Le dintlwana tša boithomelo re maketše bašomi ba rakontraka ba šomiša tša gona ka fale lepatlelong mola ele gore rakontraka o be a swanetše go nyaka dintlwana tša boithomelo tša go šutha (mobile toilets) go borakgwebo potlana ba gona mo gabo rena. Ka fao re hloka mabaka godimo ga ditiragalo tšeo efela ga re a hwetše,” A fetša ka go rialo Morwaswi.
Mampana ore badudi bao ba thwetšwego go šoma ka fao lepatlelong ke ba lesometlhano (15) ka palo gomme bona ba abetšwe go dira tsela ya pavement yeo e ka balelwago go dimetara tše 103.
“Re leboga go thwalwa le ge ele gore re šomile fela tekano ya matšatši a lesome tee ka ge re be re tshwenya ke pula efela mošomo wo re o filwego e bile o monnyane kudu ka ge o sa fetwa ke wa bafaladi makga a mane (4). Re tla tloga re fetša go ya ka kwano efela mošomo e sale o montšhi. Re le setšhaba re sa nyaka go bona re thwetšwe gape ka moso go tla go feleletša mošomo woo ka ge matšwantle a lefetšwe ditseka tša bona ebile ba sepetše,” A fetša ka go rialo Mampana
