Meyara o etetše projeke ya tsela ya Ga-Mokgotho

Meyara wa Masepala wa Fetakgomo Tubatse, Cllr Eddie Maila o tiišitše tlhokomelo le go lekola tšwelopele ya projeke ya kago ya tsela ya Ga-Mokgotho Ward 16, ka ge projeke ye e tsena legatong leo le nyakago gore mošomo o tšhabe diatla le gore ditlhohlo tšeo di diegišago kago di rarollwe.

Maila o boile lefelong la projeke ka Labohlano la di 7 Phato (August) 2026, bjalo ka karolo ya lenaneo la masepala la go lekola tšwelopele ya diprojeke tša mananeokgoparara. Ketelo ye e tla ka morago ga ditlhahlobo tše mmalwa tšeo di šetšego di dirilwe ke masepala go lekola mošomo, go šupa ditlhohlo le go kgonthišiša le gore kontraka e phethagatšwa ka mokgwa wa tshwanelo.

Morago ga ge a filwe pego ka seemo sa projeke, Meyara o ile a sepela le sehlopha sa gagwe go lebelela mošomo lefelong la kago. Ba ile ba lekola boleng bja mošomo wo o šetšego o dirilwe gammogo le tšwelopele yeo e bonagalago mo lefelong la projeke.

Go ya ka masepala, go diega ga mošomo le go ema ga kago nako e telele go ka ama maikemišetšo a go tlišetša badudi mananeokgoparara ao ba a hlokago.

Meyara Maila o ile a laetša Project Management Unit (PMU) ya masepala gore e boledišane ka pela le rakonteraka go nyakišiša mabaka ao a bakago go diega ga projeke. O rile go bohlokwa gore go kwešišwe gore ke eng seo se dirago gore mošomo o sepele ka lebelo la leobu leo le sa kgotsofatšego gomme go tšweletšwe magato a maleba a go rarolla bothata.

“Badudi ba rena ba letile ditsela tše nako e telele. Le ge re amogela ditlhohlo tšeo di bilego gona, badudi ba swanetše go bona tšwelopele yeo e bonagalago le mananeokgoparara. Masepala o tla tšwela pele go tiiša tlhokomelo le go kgonthišiša gore se se a direga.” Maila a realo.

Ditsela ke karolo ya bohlokwa ya mananeokgoparara ka gobane di thuša go kgokaganya metse le mafelo a bohlokwa go swana le dikolo, dikliniki , dikgwebo le mafelo a mangwe a ditirelo. Ka lebaka leo, go diega ga diprojeke tša ditsela go ka ama bophelo bja badudi le go sepela ga bona letšatši ka letšatši.

Meyara o boletše gore tlhokomelo ya projeke ya Ga-Mokgotho ga se tiragalo e tee feela, eupša ke karolo ya maiteko a go tiiša tlhokomelo ya diprojeke tša mananeokgoparara go dikarolo tše dingwe tša Fetakgomo Tubatse.

Maikemišetšo a masepala ke go kgonthišiša gore diprojeke tša gona di laolwa ka boikarabelo, tšhelete ya setšhaba e šomišwa ka Mokgwa wa maleba gomme mošomo o phethwa ka nako ya maleba.

Ketelo ya Meyara e file gape sebaka sa gore balaodi ba masepala ba bone ka mahlo gore mošomo o sepela bjang, go e na le go ithekga feela ka dipego tša projeke. Se se thuša go šupa mathata ka pela le go tšea magato moo go nyakegago.

Ka ge projeke ya Ga-Mokgotho e tsena legatong le bohlokwa la phethagatšo, tlhokomelo e tla tšwela pele e lebišitšwe go rakonteraka le sehlopha sa projeke gore mošomo o akgofišwe. Masepala o nyaka go bona diphetogo tše di bonagalago lefelong la kago le gore badudi ba feleletše ba hwetša tsela yeo ba e letetšego.
Masepala wa Fetakgomo Tubatse o boletše gore o tla tšwela pele go lekola projeke ye le diprojeke tše dingwe tša mananeokgoparara go kgonthišiša gore di phethagatšwa ka tshwanelo.
Go ya ka masepala, maikemišetšo a mafelelo ke go netefatša gore diprojeke tša mananeokgoparara di tliša mohola wa nnete go badudi, di phethwa ka nako yeo e nyakegago le go kaonafatša maphelo a setšhaba.
Ka fao, projeke ya tsela ya Ga-Mokgotho e tla tšwela pele e beilwe ka fase ga tlhokomelo ye kgolo ge masepala o šoma le rakonteraka le sehlopha sa projeke go rarolla ditlhohlo tšeo di lego gona le go kgonthišiša gore mošomo o tšhaba diatla go fihla pheletšong.