- Man in court after mob justice-related murder - August 18, 2026
- ORGANISATION MARCHES FOR CHURCH FREEDOM - August 18, 2026
- A LOW TURNOUT ONLY HURTS THE MAJORITY - August 18, 2026
By Karabo Makao
Nakong yeo bafsa ba bantši ba sa katanelago go hwetša mešomo, molemi wa mofsa wa Taung, ka ntle ga Burgersfort, o bontšha gore maikemišetšo, mafolofolo le lerato la temo di ka bulela motho menyetla ya katlego.
Manfair Botha Mokgatle, yo e lego molemi wa mengwaga ya ka tlasa ga 30, o fetotše temo ya lapa la gabo gore ebe motheo wa go aga bokamoso bjo bo phadimago go yena le setšhaba sa gabo.
Mokgatle o belegwe aba a golela tikologong ya magaeng a Taung. Lerato la gagwe la temo o le antšwe go tatagwe yo e lego molemi, ka ge Sepedi se re, “Mo tlhako ya pele e gatilego, le ya morago e tlo gata”, gape “mmala wa kgomo o bonala namaneng”. Ka morago ga go fetša mphato wa maremotlou ka 2019, Mokgatle o ile a kgetha go tsenela tša tema, a šoma le tatagwe ka ge a paletšwe ke go hwetša thekgo ya mašeleng mabapi le tša thuto (bursary). Monyetla wa lenaneo la goithuta tša temo la Masepala wa Fetakgomo Tubatse, le ile la mo tšwela mohola le go mo hlohletša go tsenela tša temo. Seo e bile “sentšwela kae” mo go yena ka ge a be a sa le kgakanegong. Monyetla wo Mokgatle o ile a o tsea ka matsogo a mabedi gomme a ithutela tša temo ka pelo yeo e bego e tletše lerato. Ka go šoma ka thata moo dithutong tša gagwe tša temo, Mokgatle o ile a ntšha ka ga tšhwene gomme a ithuta mekgwa ya go lokiša mašemo, go diriša menontšha (manyora), go bjala dipeu tša mehutahuta le go hlokomela dibjalo. Lehono o tšweletša merogo e e fapanego, go akaretša ditamati, dikhabetšhe, dipherefere le tše dingwe.
“Lehumo la nnete ga le lekanywe ka gore o apere bjang goba o otlela koloi ya mohuta mang, eupsa le lekanywa ka khutšo ya monagano. Temo e mpha khutšo ka gobane ke dira seo ke se ratago gomme ke aga bohwa bja leloko la ka le meloko yesu yeo e sa tlago”, a realo Mokgatle a phophoma ka lethabo le boitshepo.
Molemi yo wo mofsa o dumela gore temo e ka thuša go rarolla mathata a tlhokego ya mešomo mo go baswa, ge fela ba ka fiwa thego ya maleba le di dirišwa tšeo di hlokegaga. “Ke nyaka go godiša polasa ye gore e tle e hole batho ba bantši. Bafsa ga ba swanela go nagana ka mešomo fela, eupsa ba nagane le ka go hlola mešomo ka bo bona”, gwa realo Manfair Mokgatle, mošimane wa go tsaroga phoka wa Taung ka Burgersfort.
Le ga gole bjalo, balemi ba bantši ba bafsa ba kopana le ditlhohlo. Mokgatle ore le yena o kopana le ditlholo tše dintši eupsa seo ga se monole moko ka ge a tseba gore mathata ke tau ya mokgalabje, le gona o a tseba gore mepipi ka moka e ana. Yena ore o kgopela thušo ya didirišwa tša go swana le metšhene, go epelwa meetse, bo bolokelo le tše dingwe tšeo di ka nolofatšago mošomo wa gagwe wa temo. Le ga go le bjale, Mokgatla ore a ka se nolege moko ka ge se gagabo se re “boseka boeja”.
Taba tše tše bose bjale ka todi ya dinosi tša Manfair Botha Mokgatle, di kwala letswai, e bile di dira gore re ingwaye ka lekomane ka magetleng. Yena o hlohletša bafsa ka gore temo e ka matlafatša moruo wa naga ya gabo rena.
Bathao bao ba kgwathilwego ke taba tša mofsa yo yo bogale wa Taung ka Burgersfort, gomme ba rata go ka mo fa thušo efe goba efe, ba ka ikopanya le yena ka go ya dikantorong tša masepala wa Fetakgomo-Tubatse.
