- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka: Karabo Makao
Dikgoši le bogoši ke tlholo ya Modimo go tšwa tlholong. Se se itšhupa gore ka mehla le mabaka re swanetše re hlomphe le go ikokobetša ka tlase ga baetapele ba rena bjalo ka magoši a rena, gobane go dira bjalo ke go hlompha Mohlodi a lego magodimong. Le segagešu se re: Kgoši ke kgoši ka setšhaba, e lego seo se phethagaditšwego ke baeng bao ba etetšego mošatemogolo wa Bapedi wa Marota-Mohlaletse ka tlase ga Mokgekolo Kgošigadi Manyaku Thulare.
Histori e diragetše ka letšatši la lesomešupa kgwedi ya Phato ngwaga wa 2025, ge bakgekolo ba go tšwa motseng wa Ga-Mashamothane ba tšea leeto la go tloga motseng wa gabo bona go ya mošate wa Maroteng,Tšate lll e le go agela legora lentšu lela le rego kgoši ke kgoši ka setšhaba. Leeto la bona e be ele go laetša Mmagokgoši Manyaku Thulare gore ba ipea le go ikokobetša ka tlase ga boetapele bja bogošikgolo bja gagwe. Leeto le be le thekgilwe ke baetapele ba mošate wa Modulathoko, go akaretša William Malatji, Mpho Madire, Amos Kgoete, Mpho Mhlabini, Collen Magabotje, Sandros Ramphadi, Petrus Lewele, Jan Mnisi le Wonder’s Entertainment And Crew.
Batho bao ba tšerego karolo leetong le ke Florah Mosoma, Martha Mnisi, Eniccah Mametja, Rosinah Mokoena, Lucy Malepe, Virginia Mametja le Monica Makofane, ka moka ba tšwa Ga Mashamothane le Mareseleng.
Mmoleledi wa mošate, Mpho Madire, o boletše gore leeto le rerilwe gore le sepedišwe ga bonolo “Re tšere kgwedi go beakanya leeto le gore le be bonolo, re kgopetše thekgo go mmasepala wa Fetakgomo-Tubatse, baditirelo tša sephodisa le ba ditirelo tša tšhoganyetšo, gomme re hweditše thekgo ye tee e bohlokwa,” a realo. Molaetša wa bona ke gore basadi ba swanetše go hlomphiwa . Ba sepetše ka maoto, ba farafarilwe ke baetapele ba bona tseleng ya R37.
Leeto la bona le ile la goga mahlokgogedi a bafeti ka tsela.
Leeto le le šupa bobotse le tirišano ya setšhaba kudu magareng ga basadi le go fa monyetla wa go godiša tlhompho le boikarabelo setšhabeng tikologong ya Ga- Mashamothane.
Bakgekolo bao ba ile ba amogelwa ka diatla tše pedi ke kgošigadi Manyaku Thulare ebile a laetša a thabile ka kudu ka thlompho yeo a e filwego.
