- Diofisi tše mpsha di butšwe motseng wa Ga-Maboke - December 15, 2025
- Youngtalent set shine at upcoming contest - December 15, 2025
- 4th Annual Donate A Pen soccer tournament set to kick off at Old Fetakgomo Sports Ground - December 15, 2025
Ka: Karabo Makao
Ka letšatši la masomepedi tee kgwedi ya Ngwatobošego, O mongwe wa baetapele setšhabeng David Mokoena, gammogo le sehlopha sa gagwe, ba ile ba abela malapa ao a hlokago dijo le diaparo lekheišeneng la Praktiseer gola Burgersfort. Lenaneo leo ke le lengwe la mananeo ao a ikemišeditšego go thuša malapa ao aparatšwego ke mohlako , tlhokego ya mešomo, le maemo a boima a bophelo.
Se se thomilego bjalo ka thušo e nnyane, efela ga bjale ke sešupo sa lerato le tirelo go ba bangwe. Mokoena le sehlopha sa gagwe ba etela metse e mentšhi, ba aba dilo tša motheo go batho bao ba sa kgonego go iphediša. Kabo ye e tlišitše lethabo malapeng a mantšhi ka ge ba amogela dijo, diaparo, le dinyakwa tše dingwe tša bophelo.
Lenaneo le ga le felele fela ka go abelana ka se le sela, le ikemišeditše gape go buša serithi sa batho le go tutueletša gore ba seke ba lahla tshepo. Dijo di abetšwe malapa a go feta a Tshela(6), ao ka moka a nego maswanedi a go abelwa dijo le diaparo gobane ba lebane le bothata bja go hloka dijo kage basa šome goba ka malapeng go sena le yeo a šomago. Tše ke mekgwa yeo e laetšago botho le kwelobohloko mo setšhabeng.
Mokoena o gateletše bohlokwa bja go ema mmogo ge go le boima, a e letša le ba bangwe gore ba tsenye letsogo mo go thušeng batho bao ba hlokago le go fokotša tlala le go fediša bohloki. “Go fa gao hloke go ba kgoši goba go huma, le selo se sennyane se ka fetola bophelo bja motho.Ge re ka šoma mmogo, re ka dira phapano e kgolo kudu,” Mokoena a tlaleletša ka go realo.
Go bao ba amogetšego thušo, dijo le diaparo, seo se ke sešupo sa gore ba bonwa ge ba hloka goba go ithweša ka letolo. Mosadi yo mongwe wa moo, Mama Mabeare, o boletše ka lethabo are “Ba fihla ka nako ya maleba. Re be re šetše re sena selo selo sa go iša ka maleng”
Lenaneo le tšwela pele go gola, David Mokoena le sehlopha sa gagwe ba ikemišeditše go tsoša setšhaba le go tliša kholofelo. Mešomo ya bona ya botho e thabiša setšhaba, e tliša diphetogo, ebile e aga setšhaba seo se tlago ba le matla, se tletše lerato le tebogo.
