- JUNE 16 Uprisings. - July 12, 2026
- YOUTH GET INSIGHT ON AGRICULTURAL PROSPECTS - July 12, 2026
- Nigeria, Ghana response not helpful - July 12, 2026
By Karabo Makao
Ka letšatši la 21 June 2026 go bile le dikotsi tše pedi tša difatanaga kgauswi le dikgwebokgoparara tša Tubatse Crossing Mall, Burgersfort moo e lego gore semelwa sa bohle le sefatanaga sa mohuta wa Toyota Tazz di ilego tša lahlegelwa ke taolo ka dinako tše fapanego.
Kotsi ya pele e diregile ka iri ya 16h00 ge senamelwa sa bohle (taxi) seo se bego se nameditše banamedi ba e ka bago palo ya go lekana lesome-hlano(15) e leka go tsena ka gare ga Tubatse Crossing. Go ya ka dipego, mootledi o ile a palelwa ke go laola sefatanaga seo ge a batamela mabone a go laola sephethephethe(robots), gomme senamelwa sa bohle sa wela ka moleteng kgauswi le kgorwana ya go tsena ka mabenkeleng.
Banamedi ka moka ba ile ba thušwa ka lebelo ke bahlapetši ba sephethephethe le ditirelo tša tšhoganetšo, gomme ga go yo a bego a na le dikgobalo tše šoro. Sephethephethe se ile sa laolwa ka pela ke ba Kgoro ya Tlhapetšo ya Ditsela le spephethephethe le go thibela go gola ga bothata tseleng.
Ka morago ga kotsi yeo, go bile le kotsi e nngwe kgauswi le yona, moo sefatanaga sa Toyota Tazz le sona se ilego sa lahlegelwa ke taolo mmileng wa Dirk Winterbach (R37) gona kgauswi le Tubatse Crossing. Sona se ile sa thula leporogo pele se ka ema.
Ba ditirelo tša sephethephethe ba tiišeleditše gore ga go dikgobalo tše šoro tšeo di begilwego kotsing yeo.
“Re leboga gore dikotsi tše ga se tša feta ka maphelo a batho. Re kgopela baotledi ba mebileng go latela melao ya tsela le go fokotsa lebelo ge ba batamela mafelo ao go lego mabone a go laola sephethephethe le fao go lego mabenkele,” go boletše yo mongwe wa bahlapetši ba sephethephethe ba Limpopo.
Go ya ka CCTV footage ye e bonwego, senamelwa sa bohle se be se lebile kgorwaneng/keiting ya Tubatse Crossing ge e palelwa ke go ema ka nako, gomme ya wela ka moleteng kgauswi le mabenkele. Gape Toyota Tazz le yona e bonwe e lahlegelwa ke taolo gomme ya feleletša e thula leporogo la R37.
Maphodisa a fihlile lefolong gomme a tšere dipego go dithlatse. Dinyakišišo di sa tšwela pele go utolla lebaka leo le hlotšego dikotsi tšeo.
Bahlankedi ba mmušo ba kgothaditše badudi le bašomiši ba tsela go ba le šedi tseleng ka mehla, kudu ge ba batamela le go kgabaganya mafelo a a nago le sephethephethe.
Go lebogilwe gape gore ga go na maphelo ao a lahlegilego, gomme bohle ba amegilego ba tšwile kotseng tšeo ba phela.
