- SBV Beat Maubeng FC 2-0 in Hollywoodbets Regional League Match - May 18, 2026
- Ramaphosa could face impeachment 2 years on - May 18, 2026
- Badudi ba abetšwe monyetla wa go šoma Mamphokgo Sports Complex - May 18, 2026
Ka: Cynthia Nkgudi
John Leshilo yeo a tsebegago ka go lwela ditokelo tša setšhaba motseng wa gabo wa Leeuwfontein ka tlase ga Mmasepala wa selegae wa Ephraim Mogale, o bone go le toka gore a thome lesolo la mosepelo wa go tloga fao Leeuwfontein go ya toropong kgolo ya Polokwane go ya go ikopanya le molekgotlaphetiši wa thuto mo profenseng ya Limpopo.
Ka ge bobedi bo bolaya noga, Leshilo o tšere mosepelo wo le mofegeletši wa gagwe Samuel Moela go tloga ka Mošupologo wa la 4 Mopitlo 2026 gomme o re o holofela gore mosepelo o tla ba wa tekano ya matšatši a šupa. O tšwetše pele ka gore o nyaka go itebanya thwii le kgoro ya Molekgotlaphetiši wa tša Thuto mabapi le sekolo sa tlase seo e sa lego se tshepišwa badudi ba Leeuwfontein seripeng sa RDP le Ramotsau go tloga ngwageng wa 2016 “Ke tekano ya mengwaga ye lesome goba go feta bjale setšhaba se beile mokganya phatleng se emetše go agiwa ga sekolo seo, efeela ga go nko yeo e tšwago lemina le nankhono ya matlakana. Naga e godile e bile seripa sa RDP le Ramotsau se lekane ke sekolo. Go ya ka ditshepišo tša kgoro, nkabe sekolo e le kgale se agilwe. Re na le tlhohlo ya gore dikolo tša kgauswi di na le baithuti ba bantšhi mola go se gwa bolokega gore bana ba ka sepela leeto le le telele go tloga ka malapeng a bo bona go ya sekolong. Le lengwe lebaka ke gore ba swanelwa ke go tshela mmila wa difatanaga letšatši ka letšatši go ya ka lehlakore leo go lego sekolo mola go tletše baotledi ba go hloka šedi gomme seo se re lobiša bana” A rialo.
Leshilo o re kwešišo ya gagwe go taba ya ge kgoro ya dintlo e agela badudi ba RDP le Ramotsau dintlo tša go feta sekete,e bile gore kgoro ya thuto e be e swanetše e sedimošwe le semeetseng gore go hlokega sekolo tikologong yeo “Ke dumela gore ge kgoro ya thuto e ile ya aga sekolo ka nako ya ge go agiwa dintlo nkabe re se fa lehono. Mmušo wa rena ga o re tšeele hlogong goba bjona bokamoso bja bana ba rena. Kgauswinyana baithuti bao ba tsenago sekolo ka Mooseivier polaseng ya Schoeman ba bile le mathata a gore dinamelwa tša bona di fedišwe bjale seo se dirile gore ba palelwe ke go ya sekolong gomme ba kgakanegong e kgolo ka ye nako.” Leshilo a tšwela pele ka go bontšha gore o na le kholofelo yeo e tletšego gore ba tla hwetša dikarabo godimo ga taba ya go se agelwe sekolo morago ga mengwaga ye mekaaka e fetilego gomme ba tshepišitšwe ebile go sepela ka dinao leeto le le telele leo e tla ba tšhupo ya gore ba ikgafile go lebaka leo. O feditše ka go leboga thekgo yeo a e hweditšego ge a tloga gae Leeuwfontein, ba mekgatlo ya dinamelwa tša bohle,baotledi le batho ka kakaretšo go thekgo yeo ba ba fago yona.
