- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
By Cynthia Nkgudi
Moswa yo a tsebegago ka go ngwala le go phatlalatša dipuku tša gagwe tše pedi, ya papadi le ya kanegelo, tšeo di mmeilego maemong a go ba mothopasefoka wa Gold National Medal, lehono o ikhwetša a hlokotšwe difokeng tša boditšhabatšhaba tša Asia. Kutloano Moropyane o hlokotšwe ka tlase ga “Asia’s support awards” le “Asia’s outstanding performer award”.
Tše ke difoka tše kgolo fao Kutloano a hlaotšwego go emela Afrika Borwa ka bophara ka lebaka la bokgwari bja gagwe mošomong wa bongwadi. O re o ikwa a itumetše kudu ebile ga a kgolwe gore o hweditše taletšo ye. “Bjale ka mošimane yo a tšwago dinagamagaeng lapeng la bohloki, go mpontšha gabotse gore ga go kgathalege gore o tšwa kae feela se bohlokwa ke go lebelela moo o yago. Ka nnete go šoma ka maatla le maikemišetšo go ka go iša mafelong ao o sa gopolego gore o ka tsoga o fihlile go wona.” A realo Kutloano.
O tšwetše pele a hlaloša ka fao go bego go le boima go phenkgišana le go phadišana le bangwadi ba dinaga tša go feta tše masomehlano lefaseng, bao bangwe ba humilego ebile ba bangwe ba atlegile bophelong. “Go be go lebelelwa ditlokotlokwana tša rena tša bopaki gomme ke hlaotšwe ka gore ba hweditše dilo ka moka ka nna dikgokaganong tša leago e le tšeo di kgotsofatšago.” Kutloano o realo, a tlaleletša ka gore ba Asia Awards ba rile go tšwelelela ga gagwe ga se taba ya mahlatse le ga tee, aowa, ke sešupo sa gore ke motsebalegi wa makgonthe lefaseng ka bophara le bopapetla. Lengwalong la taletšo leo a le amogetšego, ba Asia Awards ba hlalositše ka fao ba ikgantšhago ka mošomo wa gagwe le boikgafo gomme ba thabela ge lefase le tla lemoga bokgoni bja gagwe. “Rena re le ba Asia Awards re na le maikemišetšo a go keteka dinaletšana tšeo di nago le bokgoni ebile di hlohleletša ba bangwe, gomme ka sefoka se se bjalo re laetša go reta le go šoma ka maatla ga Kutloano.” Go bolela Ngaka Nyla e lego lelokolegolo la boemeditshepedišo bja Asia Awards. O hlalositše gape le ka fao maloko a bona a lekgotlatšhomo a lego gare a netefatša dintlha tša bahlokolwa tšeo di ba dumelelago gore ba lekole ditokomanetlholoso.
Ba Asia Awards ba kgokagane le ba World Research Council(WRC), International Award Council (IAC), International Standard of Council (ISC), International Boards le maloko a mangwe a mantši. Ba tšea karolo ba tla ikhweletša monyetla wa go kopana le bangwadi, baphatlalatši ba lefase ka bophara, monyetla wa go boledišana ka mešomo ya bona. Moletlo o tla swarelwa go la The Renal Cochin, Kochi, Kerala India ka labobedi la 6 Manthole (January)2026.