Email lerato@thereporternews.co.za | 0820747215
- MEYARA O SEPETSESEPETSE LE BAREKIŠI BA MEBILENG - December 31, 2025
- FANS SHATTERED AS SHEBESHXT REMAINS LOCKED UP - December 31, 2025
- Kgaotšo ya Mohlagase ke tlhobaboroko Magakala. - December 15, 2025
Ka Cynthia Nkgudi
Lefase la bobotse le feshene le tšwela pele go bula menyetla e mentši go bommasebotsana ba baswa bao ba ikemišeditšego go bontšha lefase bokgoni le mabotse. Mmasebotsana yo a nago le mabokgoni le phišegelo ke Lerato Matshaba wa mengwaga ye Lesometshela(16) wa go tswa Burgesfort Praktiseer yoo a rego leeto la gagwe la bommasebotsana le thomile ngwageng wa 2024 fao a ilego a hwetša sebaka se se kaone sa go tšea karolo go Miss Delightful Bravery Bravo Savory e lego DBBS ka boripana. “ Ke thomile ka go fenya ka ba kgošigatšana ya pele phadišanong ya DBBS ka la lesometshela (16) Ngwatobošego 2024 gomme se ke sona se ilego sa godiša tlhase ya phišegelo le phegelelo ya ka mo go tse tsa bobotse. Go tloga fao ke ile ka tšwela pele ka tsenela Miss Sekhukhune United 2025 Teen Queen.” A realo a hlalosa ka fao a ikhweditšego a le ka gare ga lefapha le. Lerato o thomile dithuto tša gagwe sekolong sa tlase sa Koboti gomme a tšwela pele go se se phagamego fao a ilego a ikhwetša a le mphatong wa bo šupa, ka bomadimabe a gapeletšega go tlogela a se a fetša. “ Ge ke fihla go mphato wa bosupa ka madimabe ke gapeletšegile go tlogela sekolo ka lebaka la mathata a tša lephelo a go amana le tsela ya tša semoya. Seemo seo se ile sa nkimela moyeng le mogopolong, gomme sa thatafiša bophelo bja ka. Ke ka moo ke ilego ka tlogela sekolo.” A hlaloša ka boripana mokgwa ka pelo ye bohloko.
Go tlogela sekolo ga se gwa thibela Lerato go phethagatša ditoro tša gagwe ka ge bjale e le morutwana wa Moralo wa Feshene go la Polokwane School of Fashion and Design, khamphaseng ya Burgesfort fao a rego soma ka thata go ikagela bokamoso. Go kopanya tša sekolo le tše tša bommasebotsana ga go bonolo go lekgarebe le, efeela o re o ikemišeditše go tšwelela. “ Bjale ka ge ke šetše ke le morutwana wa Moralo wa Feshene, ke nyaka go ithuta le go gola. Ke hlokomela ka fao ke šomišago nako ya ka. Ga go bonolo ka dinako ka moka efeela ke thabela tlhohleletšo yeo ke e hwetšago ya go fihlelela se ke se dirago. Ka tlhohlo e ye nngwe le ye nngwe ke a gola e bile ke hwetša mafolofolo a go fihlelela le go phethagatša ditoro tša ka.” Lerato o realo ka kholofelo le boitshepho.
Ka ge go se leeto la go hloka ditlhohlo, Matshaba o ikhweditše a lebagane le boima bja go kgoboketša mašeleng a go tsenela diphadišano gomme o re o ile a swanelwa ke go loga leano. “ Ke be ke tsena lapa ka lapa ke kgopela thušo ya mašeleng, le ge ke be ke kobja, nako ye nngwe ke sa fetolwe gabotse. Go be go le boima. Tšeo ka moka ga se ka di dumelela gore di robe moya wa ka. Ke kgonne go tšwela pele le ge go be go bonagala o ka re lefase le kgahlanong le nna. Ke gopola gabotse letšatši pele ga phadišano ya Miss Sekhukhune United fao ke bilego le tlhohlo ya tlhaetšo ya mašeleng a senamelwa le ditshenyagalelo tše dingwe efeela ba Fashion Evolution Bouquet ba thuša ka roko. Ke lebogela botho bja bona le thekgo yeo ke e hweditšego go fihleng ga bjale go akaretša le ba Logan Sekele Foundation ka go nthuša go tšweleletša leina la ka.” Lerato o tšweleleditše ditlhohlo tšeo a kopanago le tšona e bile o sa kgopela thušo efe goba efe ka ge leeto la gagwe le sa tšwela pele. O re ga bjale o hlaotšwe go ba Miss Limpopo Province Teen 2026. “ Ke thabetše tsela ye ye mpsha. Ke ikemišeditše go tšwela pele ka go somisa sebaka le monyetla wo ke nago nawo go tutuetša le go hlohleletša ba bangwe. Ka ge ke itokišetša leeto le leswa, ke sa hloka thušo kudu ya mašeleng gore ke kgone go phadima sefaleng le bophelong bja ka ka kakaretšo”
You may also be interested in:
Sekhukhune TVET College’s Tshepo Rampedi crowned number 1 at the inaugural Entrepreneurship Inter-College Nationals.
MMAGO SETŠHABA MAHLAKO’A BAUBA O RE KOMA KE E NNGWE YA SETŠO LE BOHWA BJA BAPEDI.
RE KWELE GO LEKANE, SETŠHABA SE REALO!!
Mosetsana wa mengwaga ye mehlano o phayilwe thethwana ka kgang