MMAGO SETŠHABA MAHLAKO’A BAUBA O RE KOMA KE E NNGWE YA SETŠO LE BOHWA BJA BAPEDI.

Spread the news
Lerato Mampa

Mmago Setšhaba Mante Mokabane o a hlomphiwago gape ka leina la Mahlako’a Bauba go setšhaba sa gagwe motseng wa Eensam Lehlakong ka tlase ga masepala wa Makhuduthamaga o re koma etla dula e le e nngwe ya bohwa le setšo sa Bapedi.

Mahlako’a Bauba ke o mongwe wa dikgoši tšeo di kgonnego go ntšha koma yeo e atlegilego ka profenseng ya Limpopo lenyaga ka morago ga gore kgoro ya pušo tirišano, dintlo le merero ya magoši e emiše dikoma mengwaga e mebedi yago feta ka lebaka la leuba la khorona. Mmago setšhaba o re o ikwa ana le magetla ebile a ikgantšha ka koma ya gagwe kage a kgonne go bolotša banna ba masometharo-seswai( 38) gomme basadi o kgonne go bolotša ba masomešupa-nne(74) Mahlako’a Bauba o re ba bangwe baka e bona bjalo ka palo e nnyane efela yena ga nyake go amogela banna bago feta masomehlano, gomme ka lehlakoreng la basadi ga nyake go amogela bago feta lekgolo. O re lebaka la gagwe ke gore o nyaka gore ba kgone go hwetša tlhokomelo yeo e lekanego.

O tšwetše pele ka gore bao ba bego ba bolla ba boile gae ka moka gape ba phetše gabotse, o re seo se mo dira gore a ingwaye ka lekomane ka magetleng ka gore ka nako ya koma o kgona go thwala batho bao ba thušanago le yena gomme ba lebogwa ka sengwenyana gore le bona kgone go bea borotho tafoleng malapeng a bona. Lenyaga Mahlako’a Bauba o be a bolotša moroto wa Makwa le Matloša.

Mošate wa Eensam Lehlakong o ntšha koma ka morago ga mengwaga e mebedi kage ba amogela le go dumelela bana bago thoma ka mengwaga e lesomepedi goya godimo.

Ke hlohleletša batho ka moka gore ba ikgantšhe ka setšo le segagaborena, Mahlako’a Bauba a ruma kago realo.

Leave a Reply

Your email address will not be published. Required fields are marked *