- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Kabodifoka tša National Teachers Awards seleteng sa thuto sa Sekhukhune South.
Ka: Ntobeng Ramotjatji Klaas.
Segagešu se re: Nonyana tša molapo wa nopi ge di e ya go nopela nopi di bitšana ka melodi. Letšatšing la masomepedi-tharo kgweding ya July ngwaga wo, kgoro ya thuto seleteng sa Sekhukhune South(Borwa), e be e swere moletlokgoparara go la Marblehall sekolong sa tlasana sa Laërskool Marblehall.
Morerokgolo wa moletlo o e be e le go bega dipoelo tša diphadišano tša barutiši semmušo, le gona go abela barutiši bao e lego bathopasefoka difoka mafapeng ao a fapanego diphadišanong tšeo di ilego tša swariwa kgweding yeo e fitilego.
Diphadišano tše di be di swaretšwe sekolong sa tlase sa Thotaneng seketeng ya Phokoane e lego ka tlase ga boetapele bja Mme Matlala M, yeo sekete ya gagwe e bilego le batšeyakarolo ba mmalwa go feta disekete ka moka mafapeng a diphadišano. Diphadišano tšeo di tšere matšatši a e ka bago a mabedi.
Gona letšatšing leo la kabo ya difoka, mosepediši wa lenaneo e lego Mna. Mokgabudi Daniel Makatelele, o ile a sepediša lenaneo la letšatši ka bokgwari bjo bogolo le go hlompha nako. Mna.Matsapola “Marobadipalelo” Sylvester, o ile a fa mantšu a tlhohleletšo legatong la kgoro ya thuto, go ka hlohleletša batšeakarolo ka moka, re bala barulaganyi, barutiši le barutišigadi, baabadintlha phadišanong go hlaola bathopasefoka, bathekgi ba moletlo e lego Old Mutual le Metropolitan, disekete le balaodi ba tšona, go ka kgonagatša modirotona wo ka thelelo.
Ms. Masha le Ms. Mmutle ba sepedišitše karolo ya neeletšo ya disetifilarata go batšeyakarolo le bathopasefoka. Ka morago ga kabo ya difoka, morutišigadi Sethibela California, e lego mmetšatholo go Excellence in Primary School Teaching, go tšwa Montsošabošego Primary, legatong la barutiši ka la gagwe la ditebogo o ile a re: “Kgantlele ga e lahlegelwe ke selo ka go gotetša ye nngwe.” Se o be a se bolela a hlatholla gore go thušana go a hlokega go ka fihlelela tše ntšhi bjalo ka batho.
Morulaganyi wa diphadišano Mna. Rakgalakane, ge a e fa mantšu a ditebogo o boletše gore: “Dikudumela tša lena ga se ya ba tša lefela, kgobokanyong tshedimošo le thulaganyong ya modiro wo o mokaonekaone.” O ile a rweša Mna.Makatelele Daniel Mokgabudi dipataka go bokgwari tshepedišong ya lenaneo la letšatši le go hlompha nako, a leboga gape le batšeakarolo bohle, gobane therešo mphiri o tee ga o lle.Bathopasefoka ba sa fetela pele legatong la diphadišano phorobentsheng.
