- No deliberate poisoning in Ga-Maja funeral deaths - May 22, 2026
- Hijacked government yellow machine found, operator safe, suspect in court - May 22, 2026
- Ke a itshola go ba hola. - May 22, 2026
Go reng bonnyaneng ka gola ke phema diša le mesebe?
Go reng go tloga kalana e sa le nanana ka hlomarwa?
Go reng ka pharwa molato ke sa nkga mekgatho ka latofatšwa?
Go fetišwa ke padile, mme motswadi pelego ya mo fetiša.
Ke gotše ke neetšanwa meloko dithari ka belegwa ke tša go fapana,
Go reng ka re go gola diatla gwa adibetša le tša dinala di bego di ntšipa mešifa?
Ke gotše ke amušetšwa maswi a dipudi šakeng,
Ka ba lerotholana ka gola ka tielela mešifa,
Ka tamoga ka ba mohola ka holana setšhabeng.
Ke godile ke goletše bonnyaneng felo ke tšwago,
Nkabe bonnyaneng go boelwa e be nka boela ka ikhutša megokgo,
Go gola go hlogola go bona dikgolo ga go fele.
Lebelo ke kitimilego ke tšhaba le ntapišitše ke lapile,
Ke kgaratlile le naga ke nyaka boutamo ke kgeretlane ke tapile,
Tšhipu e rile ke lebelo, mohlaba wa re ke nabile.
Ke rwešitšwe dipataka le mabitsi ke gollwa tša mphefa lenaka,
Ba nthatago ba re ba ntlhahla ka nyatša ka hlahlatha,
Ke gatišitšwe santabogela se ntabogetše ke iphofora lefela.
Ke be ke dungwa maloba bjalo lehono ke duma bangwe,
Ke ikonaditše ka onala ke onetše ke sekoka,
Ke popotela e sa kwego leretheng la mohwelere ke wetše.
Ke gatile bolele letheleding ke theletše ka wela ‘dibengbotala,
Ngwana magana go botšwa ke wetše dikomeng tša batho…
Ke hloka mohola le ge mantho ke kile ka hola.
Ba ntšhupa ka ‘ntlha tša maleme seetse ge ke fulara,
Ba holegile ke ba hotše ga ke sa nale mohola,
Ke a itshola go ba hola le ge ke ba hotše ba holegile.
