- JUNE 16 Uprisings. - July 12, 2026
- YOUTH GET INSIGHT ON AGRICULTURAL PROSPECTS - July 12, 2026
- Nigeria, Ghana response not helpful - July 12, 2026
Meyara wa Masepala wa Selegae wa Fetakgomo Tubatse (FTLM), Cllr Eddie Maila, o thakgotše semmušo protšeke ya go tsentšha mohlagase go malapa a go lekana 1 500 motseng wa Leboeng ka letšatši la di 23 June 2026. Se ke tiragalo ye bohlokwa yeo e tlišitšego lethabo le kholofelo go badudi ba motse woo ka ge ditirelo go ipontšha gore di tlo tla bathong, e lego seo badudi ba motse ba bego ba se letetše ka patla le jase.
Malapa a betšwe mohlagase wo ke projeke ya Leboeng Contract A le B Electrification Project. Batho ba bantši ba be ba letile projeke ye ka kgotlelelo nako ye telele, gomme babudi ba holofela gore go hwetša mohlagase go tla fetola maphelo a bona ka ditsela tše di ntši.
“Re tshepha gore go tlišwa ga mohlagase go tla tliša kimollo ye kgolo go malapa, kudukudu go baithuti bao ba hlokago mabone go ithuta bošego. Gape go tla thuša batšofadi le malapa a mantši go phela maemong a makaone le polokego. Dikgwebo tše nnyane le tšona di tla kgona go gola le go dira gabotse ka lebaka la mohlagase woo”O mongwe wa badudi a realo.
Ge a bolela nakong ya moletlo wa go tla go gotetša mohlagase semmušo, Meyara Eddie Maila o boletše gore letšatši leo ke la boikgantšho go batho ba Motse wa Leboeng. O rile setšhaba se letile ka kgotlelelo ge e sa le projeke e thoma, gomme lehono seetša se tsene ka malapeng a 1 500.
Meyara Maila o lebogile badudi ba Leboeng ka go šireletša didirišwa tša mohlagase le ka go se di senye ge ba be ba sa emetše go tsenywa ga mohlagase go fihlela protšeke e fihla pheletšong. O rile se se bontšha gabotse gore tlhabollo ya metse ya rena e a kgonagala ge feela mmušo le setšhaba ba šomišana mmogo le ka tlemagano. O lebogile gape Eskom ka go šoma le masepala go netefatša gore projeke ye e ya phethagala gore badudi ba hwetše tirelo ye e bohlokwa.
O hlohleleditše setšhaba go tšwela pele go hlokomela le go šireletša didirišwa tša mohlagase. “didirišwa tša setšhaba ke lehumo leo le swanetšego go šireletšwa gore le hole batho ba lehono le meloko ye e tlago” Meyara a realo.
Masepala wa Selegae wa Fetakgomo Tubatse o tšwela pele go ikgafa go tliša ditirelo tša motheo le go šoma kgauswi le badudi go kaonafatša maemo a bophelo metseng ka moka ya masepala.
