- Premier encourages Naledi Ya Meso amid underperformance - February 2, 2026
- Setšhaba se kgopelwa go nyakišwa monna wa mengwaga ye masometharonne - February 2, 2026
- MEYARA O ABA DIFOKA NAKONG YA MAYORAL TOP ACHIEVERS LUNCH - February 2, 2026
Polelo ya Sepedi e re: “Di retwa di boa mokatong”. Meyara wa Mmasepala wa Selegae wa Fetakgomo Tubatse (FTLM), Cllr Eddie Maila, o swere moletlwana wa Mayoral Top Achievers Lunch, Thaba-Moshate toropong ya Burgersfort ka letšatši la 23 Pherekgong ngwaga wa 2026. Mowe a hlomphilego baithuti bao ba tšweletšego gabotse dithutong tša bona tša marematlou ngwageng wa 2025 le dikolo tša bona, mola a keteka le kaonafalo yeo e bonagalago ya dipoelo tša Marematlou tša sedikothuto sa Sekhukhune Bohlabela le Profense ya Limpopo.
Tiragalo ye e bile sebaka sa go lemoga le go leboga maiteko a baithuti, barutiši le batswadi bao ba tšerego karolo ye bohlokwa go kaonafatšeng dipoelo tša thuto. Go ya ka Meyara Eddie Maila, katlego ye e bontšha phetogo ye e tiilego go tloga dihlotlong tša histori tšeo distriki e ilego ya lebana le tšona.
“Re ikgantšha kudu ka baithuti ba rena ba mphato wa marematlou ngwageng wa 2025 le barutiši bao ba šomilego ka thata. Dipoelo tše di bontšha gore re mo tseleng ye e nepagetšego ya go fetoša histori ya thuto ya distriki ya rena,” Meyara Maila a realo.
Polelong ya gagwe ye bohlokwa le tlhohleletšo, o lebogile baithuti ka maitapišo ao ba a tšerego go fihlelela diperesente tše 86.15% mo profenseng ya Limpopo mola Distriki ya Sekhukhune Bohlabela e fihleletše diperesente tše 86.7%, ya amogelwa bjalo ka selete seo se kaonafetšego kudu profenseng mengwaga e mebedi ka tatelano.
Meyara o gateletše gore katlego ye ga se ya tšhoganetšo, eupša ke poelo ya tirišano magareng ga mmušo, dikolo le setšhaba, e le sešupo sa go laetša gore therešo;Tau tša hloka seboka di šitwa ke nare e hlotša”.
Meyara o tšwetše peke ka gore; Ge re šoma mmogo bjalo ka masepala, lefapha la thuto, batswadi le setšhaba ka kakaretšo, re kgona go hlola tikologo ye botse ya go ruta le go ithuta,” a realo.
Molaodi wa Lefapha la Thuto la sedukothuto sa Sekhukhune Bohlabela, Dr Elvis Malatjie, le yena o tšere sebaka sa go leboga baithuti, barutiši le batswadi, a gatelela bohlokwa le thekgo ya mmasepala go thuto.
“Re leboga kudu thekgo ye e tšwelago pele ye e tšwago go mmasepala wa Fetakgomo-Tubatse. Katlego ye ke dipoelo tša boitlamo bja barutiši, batswadi le baithuti, gomme re ikgantšha ka go ba sedikothuto seo se kaonafaditšego dipoelo kudu Profenseng ya Limpopo,” Dr Malatjie a realo.
O tšwetše pele ka gore Lefapha la Thuto le tla tšwela pele go šoma mmogo le mmasepala go tiišeletša gore dipoelo tše di tšwelapele go kaonefala go ya pele. Meyara Maila yena o lebogile sedikothuto sa Bogwasha ka go amogelwa bjalo ka seo se kaonafetšego kudu profenseng, a reta baemedi ba didikothuto, barutiši, batswadi le baithuti ka maiteko a bona a kopanego.
Go filwe tlhompho yeo e kgethegilego go dikolo tšeo di fihleletšego 100% , le go baithuti ba 14(lesome-nne) bao ba tšweletšego maemong a godimo ka gare go sedikothuto. Gareng ga bao ba hlomphilwego go ke Mathake Thabo wa sekolo se Phagamego sa Leolo, moithuti wa maemo a godimo ka bophara go thuto ya Science le Technology, Moime Jasean wa Sekolo sa Setegeniki sa Mogale wa Bagale, moithuti wa maemo a godimo Profenseng ya Limpopo mo go Engeneering and Graphic design.
Meyara o tiišitše gape boitlamo bja mmasepala go thekga thuto, a gatelela bohlokwa bja kabo ya ditirelo tša motheo go swana le ditsela le mohlagase bjalo ka metheo ya go ruta le go ithuta.
Mayoral Top Achievers Lunch ke karolo ya boitlamo bja Masepala wa Fetakgomo Tubatse bja go godiša thuto le go beeletša bokamosong bja baswa go tlo kgona go hlabolla naga ya rena le go godiša ikonomi.
