Email lerato@thereporternews.co.za | 0820747215
- MEYARA O SEPETSESEPETSE LE BAREKIŠI BA MEBILENG - December 31, 2025
- FANS SHATTERED AS SHEBESHXT REMAINS LOCKED UP - December 31, 2025
- Kgaotšo ya Mohlagase ke tlhobaboroko Magakala. - December 15, 2025
Ka Cynthia Nkgudi
Ka letšatši la senyane May 2025. Sedikothuto sa Lobethal profenseng ya Limpopo se ile sa swara moletlo wa go abelana ka difoka le go hlohleletša barutwana motseng wa Ga-Mashabela ka ntlenyana ga Jane Furse. Barutiši le barutwana ba gotšwa dikolong tša go fapafapana sedikothutong sa Lobethal ba ile ba tšwa ka makata namane go ya go hlwaya tsebe kage go kwa gosa kwelwe. Tlhohleletšo ya thuto ke seo se bego se phophoma fao sekolong sa godimo sa Rantobeng. Tabakgolo ya moletlo letšatšing leo ebe ele “Honouring the past, inspiring the future” yeo ka boripana e hlalošago gore “Re tlotla ba kgale le go hlohleletsa ba ka moso”. Go dira bjalo ke sešupo sa gore ba šomiša tšeo e lego diphihlelelo gomme ka tšona ba age bokamoso bjo bo phadimago.
Moetapele wa sedikothuto sa Lobethal Dr Kokela o be a thabile le go ikgantšha ka dipoelo tša dikolo tša bona kudu go lebeletšwe tša marematlou, tšona di kaonafala ngwaga ka ngwaga go tloga ngwageng wa 2016 “, Sedikothuto sa rena se tšweleditše dipoelo tša gose kgotsofatše mengwageng ya go feta kago go latelana. Ngwageng wa 2016 re itemogetše diperesente tše masomešup (70%) ngwaga wa 2017 go bile 75%, ngwaga wa 2018 gwa se be le phetogo ya fela e le 75%, ngwaga wa 2019 baithuti ba šoma ka maatla le boikgafo go hlatloša diperesente go fihla go 78 fao re bilego le moithuti wa go tšwa maemo a Pele dithutong elego Trevor Mashabela wa sekolo sa Rantobeng, ngwaga wa 2021 re hweditse 72%, ngwageng wa 2022 re hlatlogile kudu go fihla go 88%, ka 2023 ra hwetsa 89% fao le gona re bilego le Mahlatse Mahlase bjalo ka moithuti wa go tšwa maemo a pele dithutong tsa Mathematical Literacy ka dihlora profenseng ka bophara go tšwa sekolong sa Rantobeng. Ngwageng wa 2024 re hweditse 93% yeo e bilego tlhatlogo e kgolo kudu gomme ngwageng wo re šetše rena le 93,9% seripeng sa mathomo sa dithuto” Kokela a realo.
O tšwetše pele ka go gatelela gore moreromogolo wa go tlotla ba kgale le go maatlafatsa ba bjale le ba ba tlago go tla tšweletša phaphano ka ge ba tla hwetša tlhohleletšo go seo. Baithuti bao ba šomilego gabotse dithutong tsa bona ngwagola ba ile ba fiwa dimpho le mantšu a tlhohleletšo a gore ba sware ba tiiše “Mokalapa Mphiwa wa gotšwa sekolong sa Rantobeng o ikhweleditše tablet kage a bile moithuti wa maemo a pele sedikothutong le go ba moithuti wa maemo a boraro profenseng ka bophara mola Shaku Tokollo go tšwa sekolong sa Rantobeng a ithopetše monyetla wa go ya go ithuta go la Kigali kua Rwanda ka go tšwelela go African Mathematics Olympiad. Re bile le dikolo tse tharo sedikothutong sa rena tseo di ntshitsego dipoelo tse botse, Molebeledi e tswile maemong a pele ka 100% gomme bona ba ithopetse tablet, Rantobeng ya tswelela maemong a bobedi ka 97% mola Phutikwena e tswile maemong a boraro ka 96%.Bao ba sa tswelelego dithutong feela ba dira gabotse dipapading, re tlotla baemedi ba dipapadi tša mabelo, lekgotla la sedikothuto, maloko a baamedi ba barutwana le mothuši wa go ruta Mathematical Literacy elego Leutle Pollen go tšwa sekolong sa Modipadi. Go lebeletšwe baithuti bao ba tla tšweletšago dipoelo tše kaone seripeng sa mathomo sa dithuto go marematlou le seripa sa mafello ngwageng wo, re lebeletše go tlotla motutiši yo a tla ntšhago dipoelo tše kaone go Sepedi,English, LO, Tourism le dithutong tše dingwe.” Kokela a tšwela pele kago realo. O rumile ka gore go swanetše gore go thadiwe mananeo go tšwa go diphihlelelo tša kgale go ka itokišetša melekwana ya June le mešongwana ya seripa sa bobedi sa dithuto gomme a gatelela gape le gore gore maikemishetso le go šoma ka boikgafo go ka ba tlišetša diperesente tše lekgolo(100%)
