- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka: Karabo Makao
Ka letšatši la lesome kgwedi ya Lewedi ( Oktobere) 2025. Tše ke tša ka profenseng ya Limpopo fao morena Petro Malepe a hweditšego tshwanelo ya bophelo bjo bofsa ka morago ga karo ya katlego ya go tloša keloid ye e mo tlaišitsego lebaka la mengwaga ya go feta ye lesome.
Malepe, yo a belegwego ga Manoke kgauswi le toropo ya Burgersfort, o be a phela le kgolo ye kgolo ya keloid ka fase ga seledu sa gagwe yeo e bego e mo tshweya bophelong le go mo tlišetša manyami a kgatelelo ya monagano. Le ge a be a nyaka thušo ya bongaka nako ye ka moka, mengwagangwaga, go be go se na pholo go fihlela lefapha la maphelo la Limpopo le tsena taba ye ka bogare ka letšatši la pedi Lewedi 2025. Dingaka kua bookelong bjo bogolo bja Mankweng di atlegile go tloša kgolo yeo e bego e le boima bja go fihla go 3.58kg. Malepe bjale o ka fase ga tlhokomelo ya dingaka gomme o lebeletše go lokollwa ge a šetše a fodile gabotse.
Morena Malepe o ile a thušwa ke Dr Ephraim Kgwete ka nako tša ge a sa le tlalelong a sa tsebe gore a dire eng. Dr E Kgwete, ngaka ya batho, yo a bego a šomiša maatla a gagwe ka go thoma lesolokalatšo la go kgoboketša mašeleng a go thuša Malepe. Go be go lebeletšwe go kgoboketša mašeleng a ka lekanago R70,000.00 ya ditshenyagalelo tša karo. Go begwa gore batho bao ba fetago masomepeditshela ba neetše go lekana R26,000,00 gomme seo sa thuša morena Malepe.
MEC ya Maphelo, Mohumagadi Dieketseng Mashego, o retile dingaka ka bokgoni le boikgafo bja bona. O boletše a re :“Se ke bohlatse bja tirelo ya maphelo ya maemo a lefase yeo Limpopo e ka e fago setšhaba. Ke ikgantšha ka badiredi ba rena le tirišano ye e bontšhitšwego kua bookelong bja Mankweng.”
O okeditše ka gore karo ye e ka se fele fela ka go kaonafatša ponagalo ya mmele wa Malepe, eupša gape e mo lokollotše manyaming ao a bego a swanetše go phela le wona. “Go tlošwa ga kgolo ye go tšere ka nnete boima bjo bogolo mafahleng a ga gagwe.” Gwa realo MEC.
Malepe yena o lebogile ka pelo ka moka go dingaka le badiredi ba mmušo bao ba mo felego tshwanelo ya bophelo bjo bofsa le kholofelo ya go phela ka seriti. Modimo le yo mogolo.
