- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Ka: Lerato Charity Mampa
Ngwana wa mosetsana wa mengwaga ye mehlano o phayilwe thethwana ka kgang motseng wa Ngwaabe,Ga-Malekane. Go ya ka dipego ngwana yo o sepetše a ya lebenkeng la kgauswi go ya go reka malekere bjalo ka setlwaedi. Go ile ge nako eya mmagongwana a tsenwa ke maseme ka ge e be e le kgale ngwana a ile lebenkeleng. O re o ile a katana ka bobjohle legohleng go nyakana le ngwana wa gagwe. Ka morago yo mongwe wa bašomi lebenkeleng leo o ile a mmotša gore o bone ngwana a eya thoko ya gabo. Mogononelwa molatong wo ke monna wo go dumelwago gore ke mofaladi wa go tšwa nageng ya Pakistan. Tiragalo ye e diragetše ka letšatši la masometharo tee kgwedi ya agosegtose ngwaga wa 2025.
“ Go fihleng gaka ke hweditše ngwana a se gabotse gwa bitšwa maphodisa, ngwana a yišwa bookelong moo dipoelo di laeditšego gore nnete go bile bjalo leseanyana leo le dirilwe tša phaku. Sa go phula pelo maroba ke gore ngwana yo o re ka mehla ge a ile lebenkeleng leo, lefeelana leo le be le phela le mo tia ka tladimolongwana le mo gokagoketše mafelelong le mo subarela. “ Tiragalo ye bjalo ka ye entšhetšherakantše .Bohloko bja gona bo feta le bja lebole la nose”. Mmago ngwana a realo a bile a sekasekiša megokgo ya lenyamo le legakanego. Ka se sebaka ngwana o sa le ka diatleng tša ba maphelo go hwetša thušo.
Malome wa ngwana o re o kgopela gore toka e phethagatšwe kage melato ya mohuta wo gantšhi e jewa ke bjelele. Se sengwe gape o re o kgopela gore motho yo a dirilego tše tša šekeleng a ba tšwele ka motse kage go laetša gabotse gore maphelo a bana a basetsana a kotsing.
