Email lerato@thereporternews.co.za | 0820747215
- MEYARA O SEPETSESEPETSE LE BAREKIŠI BA MEBILENG - December 31, 2025
- FANS SHATTERED AS SHEBESHXT REMAINS LOCKED UP - December 31, 2025
- Kgaotšo ya Mohlagase ke tlhobaboroko Magakala. - December 15, 2025
Go utswiwa ga leruo kudu dipudi le dikgomo ke tlhobaboroko go balemirui go ralala le naga.
Maphodi a Apel seleteng sa Sekhukhune ba golegile bagononelwa ba babedi bao ba hweditšwego ba nameditše dipudi tša go lekana lesomesenyane ka sefatanageng sa bona. Bobedi bjoo bja go golegwa ke Sediba Taba wa mengwaga ye masometharoseswai ( 38 ) go tšwa motseng wa Madibong, Jane Furse le Phahla Khampepe wa mengwaga ye masomepeditee ( 21 ) go tšwa nageng ya Lesotho. Bona ba tšweletše pele ga kgorotshekelo ya Sekhukhune ka letšatši la masomeped-tshela Dibatsela ngwaga wona wo( 2025).
Bagonelelwa ba ile ba emišwa ke maphodisa ka morago ga gore ba bone sefatanaga sa mohuta wa Mazda sa boingwadišo bja profense ya Mpumalanga seo se bego se sa ješe di wela. Ke ge go tla hwetšwa dipudi tša go lekana tše lesomesenyane. Dipudi tšeo di laetša di utswitšwe gomme dinyakišišo di gare di tšwela pele go nyakana le beng ba tšona.
Molato o fetišeditšwe go letšatši la pedi Manthole go dira kgopelo ya tsheletetefo ya gore ba tšwetšwe ka ntle go sa dirwa mokgwa wa diphatišišo. Babedi bjoo bo sa le kgolegong yeo bangwe ba rego ke ntlwanaswiswi.
Komišenara wa ditirelo tša maphodisa profenseng ya Limpopo, Lieutenant Generala Thembi Hadebe o tietše taba yeo ya sehlopha sa maphodisa sa Apel magoswi ka seo e se dirilego gape o hlohleletša setšhaba go ntšha mahlo dinameng nako ya maikhutšo a Matswalo ‘a Morena.
O tšwetše pele ka gore : ” ka ge re tsena sehleng seo bohodu bo iphago maatla, re hlohleletša setšhaba ka kakaretšo go ntšha mahlo dinameng le go netefatša gore ba šireletša leruo le dithoto tša bona, e bile ba se ke ba tšwafa go bega se sengwe le se sengwe seo se ba belaetšago ntle le tikatiko.” Lietenant Generala Hadebe a ruma ka go realo.
Dinyakišišo di gare di tšwela pele. Bagononelwa ba sa thelela ka phagong ya morula ka fase ga tlhokomelo ye maatla maphodisa.
