Email lerato@thereporternews.co.za | 0820747215
- MEYARA O SEPETSESEPETSE LE BAREKIŠI BA MEBILENG - December 31, 2025
- FANS SHATTERED AS SHEBESHXT REMAINS LOCKED UP - December 31, 2025
- Kgaotšo ya Mohlagase ke tlhobaboroko Magakala. - December 15, 2025
Badudi ba Moroke le metsemabapi ka ntlenyana ga toropo ya Burgersfort ba lebane le bothata bjo bogolo ka lebaka la go tingwa ga mohlagase ga go se hlalosege, gomme malapa a šetše a dula nako ye telele ntle le wona. Metse ye e amegilego e akaretša Morapaneng, Moroke, Ditwebeleng, Ga-Mongatana, Ga-Selepe le ye mengwe yeo e sa balwego ka lebaka ka boati bja yona.
Batho ba bolela gore go tingwa ga mohlagase go tšwela pele, e bile ga ba tsebe gore ke karolo ya loadshedding ( kabagano ) goba load reduction ( phokotso ). Go tloga ka di 18 Dibatsela, malapa a dutše a timelwa mohlagase go se na le mabaka ao a hlalošitšwego.
Modudi wa Morapaneng Rachel Maleka o hlalositše mathata a bona ka mantšu a: “ Re dutše sebaka se setelele re se na le mohlagase, re beile mokganya phatleng. Go šetše go fetile dibeke tše pedi re dutše re letile go lokišwa ga mohlagase woo o tšhabago/kgaogago nako le nako. Re gapeletšega go bea ditlaleletšo go Eskom, eupša ga go thušo.” A realo a bile a fegelelwa godimo mafahla a kukegike.
Moemedi wa setšhaba, yo gape e lego Khanselara wa Ward 10, Mankotula Mashabela, o kwele mathata a badudi gomme a kgalema tsela ye taba ye e swarwago ka yona. Mashabela o boletše gore go tima mohlagase go diragala ntle le tsebišo ya semmušo gomme go senya maphelo a batho. O rile: “Go tima mohlagase ga go boima fela bathong, go senya dikgwebo, dilo tša ka malapeng le go tlogela bana ba eya sekolong ba se ba lokiswa gabotse. Re nyaka karabo le tsela ye mpsha ya tiragatšo go tšwa go Eskom.”
Mashabela o gateletše gore go hloka mmohlagase go šitiša mabaka a mantši, di senya didirišwa tša mohlagase bjalo ka ditšidifatši, diketlele, le didirišwa tše dingwe ka magaeng. O boletše gore dijo le tsona di amega kudu ka ge dutsidifatsi di sa be seemong seo se lekanetsego.
O botšišitse Eskom gore go reng go sa be le tsebišo goba temoso pele ba tima: “ Ge go se na le tsebišo, re nyaka go tseba gore Eskom e tla dira eng go thibela gore se gape se direge. Batho ba swanetše go tsebišwa sebakeng sa go makala ge go tingwa mosegare goba bošego.”
Mashabela o fele kgopelo ya gore Eskom e arabe, gomme e tšee maikarabelo ka tahlegelo yeo malapa a amegago ka yona. O rile: “ Re kgopela gore Eskom e lefe malapa a lobilego dilo tša wona. Ga go kgonege gore batho ba lahlegelwe ke dìdirišwa le dijo, gomme go hlokege yo a arabago.”
O gateletše gape gore Eskom e swanetše go kaonafatša poledišano le setšhaba ka go šomiša ditsebišo, dimemo tša ka gare le dikuranta tša selegae go tsebiša batho pele ge go tlo ba le kgaotšo ya mohlagase.
Go šetšwe go leleditšwe Eskom eupša mmoleledi wa Eskom Limpopo, Matshidiso Phaladi, ga se a arabe dipotšišo tša badudi.
Badudi ba Moroke, Morapaneng le metse ya mathoko ba re ba lapišitšwe ke bothata bjo, gomme ba nyaka gore Eskom e tšee kgato ka pela go boiša mohlagase le gore o se kgaoge le go tsebiša setšhaba ka nako.
