- BOETAPELE GA SE GO DULA SETULONG… - December 31, 2025
- Diofisi tše mpsha di butšwe motseng wa Ga-Maboke - December 15, 2025
- Youngtalent set shine at upcoming contest - December 15, 2025
Ka: Karabo Makao
Ga-Manoke Traditional Council ba ketekile letšatši la semmušo ka go bula diofisi tša bona tše mpsha tša setšhaba ka di 05 Manthole 2025 e le legato le bohlokwa la go oketša seriti sa boetapele bja setšo le go thekga badudi ba motse.
Lenaneo le le be le eteletšwe pele legatong la Acting Premier le MEC wa Ditšhelete, Mnu Kgabo Mahoai, yo a emelago Premier wa Porofense ya Limpopo.
Lenaneo le be le laolwa ke Meyara wa Fetakgomo Tubatse Local Municipality, Morena Cllr Eddie Maila, yo a sepedisutšego lenaneo ka bokgoni bjo bogolo bjalo ka molaodi wa lona. Morena Maila o boletše gore: ” Diofisi tše tše mpsha ga di re fe fela sebaka sa go šoma, eupša gape di tiiša boikokobetšo le tumelo mo setšhabeng. Re tshepa gore se se tla thuša go oketša borulaganyi le go maatlafatša setšhaba.”
Moletlwana wo o be o hlomphilwe ke sehlopha se se kgethegilego sa baetapele, go akaretša Acting Executive Mayor Cllr Kukie Sefala Makgolane, Speaker wa Sekhukhune District Municipality Cllr Kgoediebotse Chego, Whip wa Council Cllr Mphethi, Acting Chairperson wa Limpopo House of Traditional Leaders le Khoisan Kgoshigadi Malepe, le Chairperson wa CONTRALESA Kgošigadi Seopela.
Badudi ba mo motseng le baetapele ba setšhaba ba boletše gore diofisi tše tše mpsha di tla ba thuša go šoma ka bokgoni le go tšwetša pele merero ya bona. Mmoleledi wa setšhaba sa ga Manoke, Nkgafeni Manoke o boletše gore: ” Re thabile kudu ka go agwa ga diofisi, se se ra gore baetapele ba setšhaba ba tla šoma gabotse ka gore go na le lefelo leo le kaonafaditšwego e bile go tla ba bonolo go rulaganya merero ya motse.”
Meago ye e kgokaganya setšhaba le gore ba be le tšhomišano ye ntši go akaretša pušo. Fetakgomo Tubatse Local Municipality e leboga thekgo ya Mmušo wa Porofense ya Limpopo ka go tiiša gore boetapele bja setšo bo tšwele pele go oketšwa le go matlafatšwa.
Morena Maila o gateletše gore go bula diofisi tše ke legato le bohlokwa la go tiiša tshepetšo magareng ga mmušo, baetapele ba setšo le badudi. “Se se tla oketša borulaganyi le go matlafatša ditirelo tša setšhaba. Re tshepa gore go tla ba le tšhomišo ye botse ya go ba le mohola le go tšweletša magato a tlhabollo mo tikologong ya ga borena.”
Tiragalo ye e bontšha gore go na le tumelo ye kgolo le tlhompho go baetapele ba setšo, gomme badudi ba bona ba tla tšwela pele go ba le seabe sa bona mererong ya setšhaba. Diofisi tše tša Ga-Manoke di swanetše go ba motheo wa go oketša tsogo le tlhabollogo ya setšhaba, tlhompho le borulaganyi mo nakong ye etlago.
