- Batladumisa crowned champions of Serafa Monthly Soccer Tournament - April 14, 2026
- Leadership flocks to Moria for Easter sermon - April 14, 2026
- More young people to benefitfrom business support initiative - April 14, 2026
By Cynthia Nkgudi
Lapa leo le hlokilego ntlo ya maleba sebaka se telele motseng wa India tikologong ya Ga-Maisela, batla ipona ba nale mowe ba beago hlogo ntshe, ka morago ga gore setšhaba sa motse o we se kopane go thuša lapa leo gore ba hwetše ngwako. Seo se latela ka morago ga gore setšhaba se lemoge gore maano a bona a gore lapa leo le hwetše ntlo ya RDP le se tšwelele. Lapa leo la ga Mpaketsane go begwa e le lapa leo le itemogelago bohloki le bošuana kudu mowe e lego gore le sebjana sago jela gase gona.
Go begwa gape gore ke lapa la batho bao ba sego ba itekanela gabotse ka monaganong. Seemo seo ke sona se dirilego gore setšhaba se eme ka maoto go netefatša gore serithi sa lapa leo sea lotwa.
Nape Maisela yoo e le go o mongwe wa balwela ditokelo tša setšhaba tikologong yeo o re ba tšere kgato ya go thuša lapa leo ka ge ba bone ka fao ba phelago ka gona seemong sa go se ješe di wela “Ntlo ya bona e be e se yeo e bolokegilego fao go bego go bonala gore e ka phušuga neng goba neng. “Re ile ra ikopanya le bašomedi ba maleba ba go abela badudi dintlo tša di RDP ba Mmasepala wa Fetakgomo Tubatse, gore ba ke ba loge maano a go nyakela lapa la Mpaketsane bodulo bjo bokaone bja lebakanyana ge go sa emetšwe ntlo yeo ya mphiwafeela, gomme le lehono ba lapa ba sa beile mokganya phatleng”, Maisela a realo.
O tšwetše pele ka gore ka morago ga gore ba bone gore batho bao ba nago le maikarabelo a go thuša ka dintlo tša RDP ba goga maoto gomme bona bjale ka setšhaba ba ile ba ipopa ngata e tee.
“Re ile go bona bao ba Mmasepala ba goga maoto, ra kgobokana re le setšhaba ra ipopa ngatana e tee gomme ra kgopediša go setšhaba go thuša ka dikago gore lapa leo le thušege. Re lemogile gape le gore mohlagase wa bona ka fao lapeng ga o šome mola dithapo tša ona di gogoba fase go hloka yo a ka begago taba yeo” Maisela a rialo ebile a tšwela pele ka gore Mmasepala ke gona o bontšhago go nyaka go thuša mola bona ba weditše tema “ Ba Mmasepala e sale mola ba tlišetša lapa leo mapai le magogwa(sponge) ba tshepiša gape le go ba thuša ka bodulo bja lebakanyana feela le lehono re sa letile.
Ga bjale ka thušo ya badudi re kgonne go emiša leboto la diphapoši tše nne gomme re šaletšwe feela ke go feleletša diphapoši tše dingwe, re beye masenke e be gona ge ntlo e feleletše. Re sa dira boipiletšo go setšhaba go thuša ka kago efe goba efe, go tliša matsogo goba go ya go reka dikago kage re sa amogele thušo ya mašeleng” Maisela a fetša ka go rialo.
Mmoleledi wa lapa la Mpaketsane e bile e le buti wa mong wa lapa o re o leboga setšhaba sa ga-Maisela ka maitapišo a bona ebile lapa la ngwanabo bjale gona le tla swana le a mangwe malapa “Ntlo ya ka fao go moratho wa ka e be e šiiša mo okarego ga go dule batho ka ge go hlokega le letseno efeela go kaone ka gore go bonagala go tla loka. O tšwetše pele ka gore le bana bao ba phailago le molala batla bowa ka gae ka ge ba se ba bolokega ebile resa tsebe le mo ba phelago.”Gwa rialo Isaac Mpaketsane a bontšha gape gore tlhohlo enngwe ke gore ga ba hwetše mašeleng a mphiwafeela. “Efeela ke kwele gore badudi ba nyakile bašomi ba maleba ba go tseba go boledišana le balwetši ba monagano, ke tshepa gore ba tla dira bokaone”Mpeketsane a ruma kago realo.
