- Batladumisa crowned champions of Serafa Monthly Soccer Tournament - April 14, 2026
- Leadership flocks to Moria for Easter sermon - April 14, 2026
- More young people to benefitfrom business support initiative - April 14, 2026
By Karabo Makao
Badudi ba motse wa Ga-Kgwete ka ntlenyana ga Moroke ba nyaka dikarabo ka morago ga gore mošemane wa mengwaga ye 13 a hwetšwe a hlokofetše ka mokgwa wo gosa tlwaelegago.
Tiragalo yeo ya go garoša matswalo e šeile badudi ka gare ga bohloko le poifo. Go ya ka dipego mošemane yowe o ile a hlokofatšwa ke borakgwebo ba bafaladi bao ba tsebjwago gape ka gore ke “makula” tikologong ya gabo bona.
Tiragalo ye e diregile ka letšatši la 27 Hlakola 2026, go kwala gore lesogana leo le ile la etela a mangwe a dikgwebo go yo ntšha tšhelete ya seatleng (cash back). Bao ba di dutšego kgauswi bare go ile gwa ba le mathata a marangrang( Network) gomme la se kgone go hwetša tšhelete yeo le bego le e nyaka.
Ka morago ga tiragalo yeo, borakgwebo ba ile ba lemoga gore sedirišwa sa bona sa go lefediša (speed point) se lahlegile. Seo ile sa ba hlohleletša go nyakana le mošemane yeo , mowe go begwago gore ba ile ba mo hwetša gomme ba thoma go mo phara ka dipotšišo.
Dipego di laetša ge mošemane yeo a ile a latola ditatofatšo tšeo ka moka a bego a pharwa ka tšona. Gosa le bjale o ile a iteiwa le go tlaišiwa ka tsela ye bohloko. Maphodisa ao a bego a feta kgauswi a ile a bitšwa gore a tle a phološe bophelo bja yewe, gomme o ile išwa setišeng sa maphodisa sa Moroke (Mecklenburg) go hlabjwa ka dipotšišo.
Go ya ka tshedimošo, lesogana leo le ile la bušetšwa gae ka morago ga dipotšišo, eupša di iri tše sego kae ka morago, la hwetšwa le hlokofetše, le lekeletše godimo ga tlhaka ya ntlo ya ka gabo.
Moetapele wa Ga-Kgwete Moraba Nthite o boletše ka bohloko bjo bogolo ka tahlegelo ya ngwana yowe “Ke bohloko kudu go lahlegelwa ke ngwana ka tsela ye. Ngwana yo o be a sa swanelwa ke go feta ka tlaišo ye bjalo. Re nyaka nnete le toka di dirwe.”
Seripa se sengwe sa badudi bao ba kgopetšego goba bo tlhokaina bare tiragalo yeo e ba tšhošitše kudu. “Se se diregilego se re tšhošitše ka moka. Bana ba rena ga ba sa bolokegile, gomme re kgopela gore toka e phethagale ka ponyo ya leihlo.”
Ba lapa la mošemane yeo ba dumela gore tlaišo yeo a itemogetšego yona e ka ba e amana le lehu la gagwe, gomme ba nyaka gore maphodisa a dire dinyakišišo tše di tseneletšego go utolla nnete.
Maphodisa ga se a ka a fana ka tshedimošo e tletšego tiragalo yeo, eupša go lebeletšwe gore dinyakišišo di tla tšwela pele. Setšhaba sona se kgopela toka, mola se lla ka tahlegelo ya bophelo bjo bo sa lego bjo bonnyane.
Tiragalo ye e tsošitše dipelaelo ka tšhireletšego ya bana le ditiragalo tša tlaišo tikologong, moo badudi ba kgopelago magato a thata go thibela ditiragalo tša mohuta wo go direga gape.
Lapa le setšhaba ba šetše ba letile dikarabo le toka mabapi le lehu la mošemane yeo.
