- Dinoko FC boys show their class at Polokwane youth tournament - September 19, 2025
- Future looks bright for young farmer - September 19, 2025
- Setšhaba sa Dihlabaneng se lla ka bohodu - September 19, 2025
Limpopo Society of Advocates e abetše barutwana ba sekolo sa tlasana sa Matleu dieta tša sekolo
Ka: Lerato Charity Mampa
Ka ge kgwedi ya go keteka letšatši la matswalo la Presidente ya kgale Nelson Mandela e fihla mafelelong, Limpopo Society of Advocates e ile ya dira sela mangwalo a makgethwa a rego; letsogo leo le fago ke leo le šegofatšwago. Difahlego tša barutwana le batswadi di be di tletše ka Lethabo, gomme ge e le boithabišo go tšwa go barutwana e be le ga mantšha o tlogele. Moletlo o be o thekgilwe le ke ba mošate wa motse wa GaMakopa. Letricia Moukangwe e lego motlatša modulasetulo wa lekgotlapušo la sekolo o boletše gore, seo Limpopo Society of Advocates e se diretšego bana ba bona ke se segolo ka kudu ka ge bana ba tla kgona go ya sekolong ntle le go ngongorega ka taba ya go hloka dieta. Mme Moukangwe o tšwetše pele ka gore o kgopela gore batswadi ba metse ya kgauswi, ba tlogele go iša bana ba bona dikolong tša metse mabapi gore sekolo sa Matleu le sona se gole se swane le dikolo tše dingwe.
Julia Matebane e lego o mongwe wa batswadi yo a bego a lego gona go tla go hlatsetša selo se sebotse seo Limpopo Society of Advocates e se dirago, o boletše le mare a sa metše gore seo sa go direga sekolong sa bona ke mahlogonolo, ka ge baeng ba go swana le ba e se ga ntšhi ba ka go etela. Ka go realo ke re: “Ka nnete moeng etla ka gešo re je ka wena.”, a ruma ka go realo. Motswadi o mongwe o tladitše ka la gore ga di ješe di wela go bona ngwana a etšwa ka gae ka dieta tša maratha.
Mme Malatji o a bego a emetše Limpopo Society of Advocates o boletše gore seo ba go se direla sekolo sa matleu ke seo ba se dirago ka ngwaga ka ngwaga kudu ka kgwedi ya matswalo a Mandela, gomme lenyaga ba kgethile sekolo sa Matleu ka ge o mongwe wa badirammogo le bona Advocate Mashabela e le o mongwe wa bao ba tsenego sekolo sa Matleu. Ramolao Malatji o tšwetše pele ka gore barutwana ba go lekana lekgolo ba tla hwetša dieta tša sekolo, kudu bana bao ba tšwago malapeng a dikobo magetleng. O tšwetše pele ka gore seo ba se dirago ke go leka go hlohleletša barutwana gore ba rate sekolo le go tseba bohlokwa bja thuto bophelong.
Mogau Radingwana wa mengwaga ye lesomesenyane o be a biditšwe gotla go hlohleletša barutwana ka ge a thomile go hwetša difoka le di metale a sa le sekolong sa tlasana. Mogau o gateletše gore, tloga tloga e tloga kgale modiši wa dikgomo o tšwa natšo šakeng.
Advocate Sello Mashabela o boletse gore seo ba go se dira sekolong sa Matleu ke go laetša barutwana gore mowe motho a tšwago gona ga se seo se ka laolago gore e ka ba eng bophelong. Ge a ruma poleleo ya gagwe o rumile ka gore: “Ga gabo motho ga go nale bosehlana.”.
You may also be interested in:
Sekhukhune TVET College’s Tshepo Rampedi crowned number 1 at the inaugural Entrepreneurship Inter-College Nationals.
Ga-Phaahla residents fierce over delayed road project
Mokete wa go abelana ka difoka sekolong sa Rantobeng
Kabodifoka tša National Teachers Awards seleteng sa thuto sa Sekhukhune South