Email lerato@thereporternews.co.za | 0820747215
- MEYARA O SEPETSESEPETSE LE BAREKIŠI BA MEBILENG - December 31, 2025
- FANS SHATTERED AS SHEBESHXT REMAINS LOCKED UP - December 31, 2025
- Kgaotšo ya Mohlagase ke tlhobaboroko Magakala. - December 15, 2025
By: Karabo Makao
Meyara wa Mmasepala wa Fetakgomo Tubatse, Eddie Maila, o dirile ketelo ya go sepelasepela le go etela barekiši ba mebaraka ya go ikemela kua Burgersfort ka di 12 Manthole 2025, ka maikemišetšo a go boledišana le go lebana le bareki bao ba šomago mo lefelong leo.
Poledišano ye e bile karolo ya maiteko a Mmasepala a go tšwela pele go thekga kgwebo ya go ikemela le go kwešiša ka botlalo ditlhohlo tšeo barekiši ba kopanago natso ka mehla ge ba dira mešomo ya bona. Meyara o theeleditše ka kelohloko dinyakwa le dikgopelo tša barekiši, a bontšha boikemišetšo bja Mmasepala bja go šoma mmogo le bona go hwetša ditharollo tše di swanetšego.
Yo mongwe wa barekiši, Morena Obed Mnisi, yo e lego mošomi wa go kota moriri gona mo lefelong le o amogetše ketelo yeo gomme a leboga tsenogare ya Mmasepala. O boletše gore : ” Go na le tswalano ye botse magareng ga barekiši le Mmasepala ka ge ba abetšwe mafelo a semmušo a go šomela. Le ge go le bjalo, re kgopela gore go abelwe mafelo a polokelo ya didirišwa gore didirišwa tša rena di bolokege bonolo ka morago ga nako ya mošomo.” A realo.
Nakong ya poledišano, bareki gape ba tšweleditše ditaba tša taolo ya ditšhila, ba kgopela go fiwa sebjana sa go lahlela tshila (skip bin) go thuša go polokego le tlhweko. Ba boletše gape ka ditiragalo tšeo go tšona ba begwago gore ba kgopelwa go lefa tšhelete yeo e fapafapanago go tloga go R50 go ya go R500. Go thwe go nkga legotlo felo fao. Go ya ka polelo ya bona, batho bao ba kgopelago tšhelete ba ipolela gore ba emela Mmasepala.
Ge a araba ditaba tšeo, Meyara Maila o hlalositše seemo sa Mmasepala, a gatelela boikarabelo, botshepegi le go latela melao. O boletše gore : ” Dikgoba di agilwe ka nepo ya go fa bareki ba go ikemela tšhireletšo, polokego le seriti. Go hlokomela go hlweka le thulaganyo ya lefelo ke boikarabelo bjo bo abelanwago magareng ga Mmasepala le barekiši.”
Meyara o ile a lemoša bareki gore ba se ke ba dira ditefo go batho bao ba sa dumelelwago. O boletše gore Mmasepala ga o dumelele go kgoboketšwa ga ditefo ntle le ge di latela ditshepedišo tše di amogetšwego semmušo. Bareki ba kgothaletšwa gore ba se ke ba lefa mang le mang yo a ipolelago gore o emela Mmasepala ntle le go netefatša boitsebišo bja gagwe le go fewa ntseketlana ya semmušo.
Go maatlafatša kgokagano le thekgo, Meyara o tsebišitše tsenogare ya taolo. O boletše gore: “ Go tloga ka Mošupologo, 15 Manthole 2025, mohlankedi wa Yuniti ya Tlhabollo ya Ikonomi ( Local Economic Development Unit) ya Selegae o tla bewa kua Ofising ya bareki ba Mmasepala go thuša ka thulaganyo, polokelo ya didirišwa le go rarolla ditlhohlo ka dinako tsohle.
Mmasepala wa Fetakgomo Tubatse o bušitše boikemišetšo bja wona bja go hlama tikologo ye e bolokegilego, e laolwago gabotse , e hlohleletšago kgwebo ya go ikemela, ka go lemoga kabelo ye bohlokwa yeo barekiši ba go ikemela ba e neelago go tlhabollo ya ikonomi ya selegae.
